Թրամփը Իսրայելում ազդարարել է խաղաղության դարաշրջան

Ինձ համար մեծ պատիվ է՝ մեծ ու գեղեցիկ օր։ Նոր սկիզբ։ Այս հակիրճ, սակայն խորհրդանշական գրառմամբ ԱՄՆ նախագահ Դոնալդ Թրամփն ամրագրել է իր պատմական այցն Իսրայելի խորհրդարան՝ Քնեսեթ՝ բացելով նոր էջ երկու երկրների հարաբերություններում և ամբողջ Մերձավոր Արևելքի համար։ Նրա այցը համընկել է Իսրայելի նորագույն պատմության ամենահուզիչ պահերից մեկի՝ Գազայի հատվածից երկու տարվա գերությունից հետո պատանդների վերջնական վերադարձի հետ։

Թրամփի այցը Իսրայել վերածվել է իսկական տոնակատարության։ Իսրայելցիները նրան դիմավորում են որպես հերոսի, ում վճռական միջնորդական ջանքերի շնորհիվ հնարավոր դարձավ վերջ դնել երկարատև պատերազմին և տուն վերադարձնել գերեվարվածներին։ Ամբողջ երկրում՝ Թել Ավիվի փողոցներից մինչև Երուսաղեմ, մարդիկ տոնում են՝ ծածանելով Իսրայելի և ԱՄՆ-ի դրոշները։ Այս համաժողովրդական ուրախության ֆոնին Թրամփի ելույթը Քնեսեթում և նրա թողած գրառումը դիտարկվում են որպես երկամյա մղձավանջի ավարտի և խաղաղ ապագայի հույսի խորհրդանիշ։

Ի նշան երախտագիտության՝ Իսրայելի ղեկավարությունը որոշել է ԱՄՆ նախագահին շնորհել երկրի բարձրագույն պարգևները։ Թրամփի այցը դուրս է գալիս սովորական քաղաքական այցի շրջանակներից։ Տարածաշրջանում հույս ունեն, որ ԱՄՆ նախագահի հետ կհաջողվի հարթել առկա տարաձայնությունները ոչ միայն Գազայում, այլև այլ վայրերում։