ՆԱՏՕ-ի գլխավոր քարտուղար. Ռուսաստանը միշտ խարխլելու է համաշխարհային կարգը

ՆԱՏՕ-ի գլխավոր քարտուղար Մարկ Ռյուտեն հանդես է եկել կոշտ հայտարարությամբ՝ ընդգծելով, որ Ռուսաստանից բխող վտանգը երկարաժամկետ բնույթ է կրում և չի սահմանափակվում միայն Ուկրաինայում շարունակվող հակամարտությամբ։ Նրա խոսքով՝ Մոսկվան տեսանելի ապագայում կշարունակի մնալ ապակայունացնող ուժ ոչ միայն Եվրոպայում, այլև ամբողջ աշխարհում։

«Այն սպառնալիքները, որոնց մենք բախվում ենք, իրական են և երկարաժամկետ։ Ռուս-ուկրաինական ռազմական հակամարտությունը այդ սպառնալիքի ամենաակնհայտ օրինակն է։ Սակայն Ռուսաստանից բխող վտանգը չի վերանա նույնիսկ այս պատերազմի ավարտից հետո», - նշել է Ռյուտեն։

Նա ընդգծել է, որ Ռուսաստանը միայնակ չէ միջազգային կարգի հիմքերը խարխլելու իր փորձերի մեջ։ Ըստ ՆԱՏՕ-ի ղեկավարի, Մոսկվան ակտիվորեն համագործակցում է Չինաստանի, Հյուսիսային Կորեայի, Իրանի և այլ երկրների հետ՝ ռազմարդյունաբերական ոլորտում փոխգործակցությունը հասցնելով «աննախադեպ մակարդակի»։

Այս համատեքստում Ռյուտեն կոչ է արել դաշինքի անդամներին շարունակել ներդրումներ կատարել պաշտպանության և ամենաառաջադեմ տեխնոլոգիաների ոլորտում՝ ընդգծելով, որ սա միակ ճանապարհն է՝ դիմակայելու այսօրվա և վաղվա մարտահրավերներին։