NASA-ն 2026-ին խումբ կուղարկի Լուսին՝ 50 տարվա դադարից հետո

NASA-ն հայտարարել է, որ ավելի քան 50 տարվա դադարից հետո նախատեսում է իրականացնել մարդկանց կողմից կառավարվող առաջին առաքելությունը դեպի Լուսին՝ նշելով, որ «Արտեմիս II» (Artemis II) ծրագրի մեկնարկը կարող է լինել արդեն 2026 թվականի փետրվարին։ Սա կլինի պատմական պահ մարդկության կողմից տիեզերքի յուրացման գործում։ Առաքելությանը կմասնակցի չորս տիեզերագնաց՝ NASA-ի ներկայացուցիչներ Ռիդ Վայզմանը, Վիկտոր Գլովերը, Քրիստինա Կոխը և Կանադայի տիեզերական գործակալությունից Ջերեմի Հանսենը։

Տասնօրյա թռիչքի ընթացքում նրանք վայրէջք չեն կատարի Լուսնի վրա, այլ կպտտվեն նրա շուրջ՝ փորձարկելով «Օրիոն» (Orion) տիեզերանավի և SLS հզոր հրթիռային համակարգի բոլոր կենսական համակարգերը։ Սա կարևոր նախապատրաստական փուլ է «Արտեմիս» ծրագրի հաջորդ քայլի՝ Լուսնի մակերևույթին մարդու վայրէջքի համար։

Առաքելությունն ունի պատմական նշանակություն, քանի որ տիեզերագնացները կթռչեն ավելի հեռու, քան երբևէ որևէ մարդ՝ Լուսնից անցնելով մոտ 9,200 կմ։ Թռիչքի ընթացքում նախատեսված է իրականացնել «տիեզերական բալետ» կոչվող բարդ գործողություն, որի ժամանակ տիեզերագնացները ձեռքով կկառավարեն «Օրիոնը»՝ փորձարկելով ապագա վայրէջքի մոդուլի հետ կցման ընթացակարգերը։

Կարդացեք նաև՝

Տիեզերագնացները նաև կդառնան մի տեսակ «մարդ-փորձարկվողներ»։ Գիտնականները նրանց արյան նմուշներից կաճեցնեն հյուսվածքային նմուշներ՝ «օրգանոիդներ», որոնք կհամեմատվեն թռիչքից հետո վերցված նմուշների հետ։ Սա թույլ կտա խորությամբ ուսումնասիրել միկրոգրավիտացիայի և ճառագայթման ազդեցությունը մարդու օրգանիզմի վրա՝ առանց տիեզերագնացներին վտանգի ենթարկելու։

«Արտեմիս II»-ի հաջողությունը ճանապարհ կհարթի «Արտեմիս III» առաքելության համար, որի նպատակն արդեն Լուսնի վրա վայրէջք կատարելն է։ Սակայն փորձագետները զգուշավոր են ժամկետների հարցում։ Նրանք նշում են, որ նույնիսկ այս թռիչքի անթերի ընթացքի դեպքում, 2027 թվականի կեսերին Լուսնի վրա վայրէջք կատարելու նպատակը կարող է չափազանց լավատեսական լինել, քանի որ դրա համար անհրաժեշտ SpaceX-ի Starship վայրէջքի մոդուլը դեռ երկար ճանապարհ ունի անցնելու։