Նարեկ Կարապետյանը հայտարարել է «Մեր ձևով» կամավորական շարժման ստեղծման մասին

Հայտարարում ենք «Մեր ձևով» կամավորական շարժման ձևավորման մասին, օգոստոսի 29-ին շարժման շնորհանդեսի ժամանակ ասել է Նարեկ Կարապետյանը։

«Կամավորական շարժումն այն հարմար ձևաչափն է, որը թույլ կտա առանց մեր հասարակությանը բաժանելու՝ համախմբել մարդկանց լավ, մեծ ու բարի գործեր անելու համար»,- նշել է նա:

«Տաշիր գրուպ» հոլդինգի ղեկավարի տեղակալ Նարեկ Կարապետյանը շեշտել է, որ շարժումը ապաքաղաքական է, այն կամավոր միավորում է մարդկանց, ովքեր պատրաստ են անձնուրաց ծառայել հանրօգուտ նպատակի։ Շարժման մասնակիցները կարող են լինել տարբեր մասնագիտությունների և հայացքների տեր մարդիկ։

«Բայց նաև ստեղծելու ենք նոր քաղաքական ուժ։ Հայաստանում սպասվող ընտրություններին մասնակցելու համար քաղաքական միավոր ստեղծելն ամենահարմար ձևն է»,- շեշտել է շարժման համակարգող Նարեկ Կարապետյանը։ Շարժումն իրականացնելու է գործողություններ 5 ուղղությամբ, ստեղծվելու է 5 աշխատանքային խումբ։