Չեռնոգորիան դադարեցնում է Թուրքիայի հետ առանց վիզայի ռեժիմը

Չեռնոգորիայի կառավարությունը հրատապ կարգով որոշում է կայացրել ժամանակավորապես դադարեցնել Թուրքիայի քաղաքացիների համար գործող առանց վիզայի ռեժիմը։ Այս քայլը հետևել է մայրաքաղաք Պոդգորիցայում տեղի ունեցած բռնի միջադեպին, որին, ենթադրաբար, մասնակցել են Թուրքիայի քաղաքացիներ, և որն առաջացրել է տեղի բնակչության զանգվածային դժգոհությունը։

Վարչապետ Միլոյկո Սպայիչը հայտարարել է, որ որոշումը կկայացվի արտահերթ ընթացակարգով՝ նպատակ ունենալով կարգավորել իրավիճակը։ Միևնույն ժամանակ, նա ընդգծել է, որ Չեռնոգորիան ձգտում է պահպանել Թուրքիայի հետ բարիդրացիական հարաբերությունները։ «Տնտեսական ակտիվությունը և երկկողմ լավ հարաբերությունները պահպանելու համար մենք առաջիկայում ինտենսիվ բանակցություններ կսկսենք Թուրքիայի Հանրապետության հետ՝ լավ համագործակցության և դաշնակցային ոգով փոխշահավետ լավագույն մոդելը գտնելու համար», - գրել է Սպայիչը X սոցիալական ցանցում։

Կառավարության այս որոշման հիմքում ընկած է Պոդգորիցայի Զաբյելո թաղամասում տեղի ունեցած միջադեպը, որտեղ դաժան ծեծի է ենթարկվել և դանակահարվել 25-ամյա տեղի բնակիչ։ Տուժածը պնդում է, որ իր վրա հարձակվել են Թուրքիայի քաղաքացիներ։ Ոստիկանությունը հայտնել է, որ փնտրում է երեք հարձակվողի, որոնք, ենթադրաբար, թուրքեր են։

Միջադեպը զայրույթի մեծ ալիք է բարձրացրել։ Թաղամասի բազմաթիվ բնակիչներ հավաքվել են՝ իրենց բողոքն արտահայտելու համար՝ պարբերաբար վանկարկելով թուրքերի հասցեին վիրավորական արտահայտություններ։ Իրավիճակը սրվել է այն աստիճան, որ ոստիկանությունը լայնածավալ գործողություններ է սկսել թաղամասում՝ իրականացնելով խուզարկություններ մի քանի վայրերում։

Լարվածությունը հասել է գագաթնակետին, երբ Թուրքիայի երեք քաղաքացի, վախենալով տեղացիների հաշվեհարդարից, պատսպարվել են խաղատներից մեկում։ Ականատեսների վկայությամբ՝ տեղացիների մի խումբ փորձել է ֆիզիկապես հաշվեհարդար տեսնել նրանց հետ։ Ոստիկանությունը ստիպված է եղել միջամտել՝ նրանց անվտանգ դուրս բերելու համար։ Երկու թուրք քաղաքացի ձերբակալվել է, և, ըստ ոչ պաշտոնական տեղեկությունների, նրանցից մեկը կասկածվում է նախորդ գիշերվա հարձակմանը մասնակցելու մեջ։ Այս իրադարձություններից հետո հավաքված ամբոխը սկսել է ցրվել։