Հնդկաստանի վարչապետը հանդիպել է Չինաստանի ԱԳ նախարարի հետ

Հնդկաստանի վարչապետը հանդիպել է Չինաստանի ԱԳ նախարար Վան Ի-ի հետ։ Կողմերը քննարկել են երկկողմ հարաբերությունների զարգացումը:

Ըստ Մոդիի հայտարարության՝ Չինաստանի դիվանագիտության ղեկավարի այցը եղել է նախորդ տարի Կազանում առաջնորդների մակարդակով սկսված երկխոսության շարունակությունը:

Հնդկաստանի վարչապետը հանդիպումը որակել է կառուցողական և ընդգծել, որ ՉԺՀ նախագահ Սի Ցզինպինի հետ իր բանակցություններից հետո Նյու Դելիի և Պեկինի միջև հարաբերությունները «կայունորեն զարգանում են»՝ հիմնված փոխադարձ հարգանքի և միմյանց շահերի հաշվի առնելու վրա:

«Անհամբեր սպասում եմ երկխոսության շարունակությանը Տյանցզինում կայանալիք ՇՀԿ գագաթնաժողովում», - հայտարարել է նա՝ վստահություն հայտնելով, որ Ասիայի երկու խոշորագույն երկրների միջև կանխատեսելի և կայուն հարաբերությունները կնպաստեն տարածաշրջանում և աշխարհում խաղաղությանն ու բարգավաճմանը: