Միսիսիպիում փորձարարական կապիկներ են փախել. մեկը կարող է վարակիչ լինել

ԱՄՆ Միսիսիպի նահանգում տագնապալի իրավիճակ է ստեղծվել։ Շրջվել է փորձարարական կապիկներ տեղափոխող բեռնատարը, ինչի հետևանքով տասնյակ «ագրեսիվ» պրիմատներ հայտնվել են ազատության մեջ։ Այս մասին հայտնել է Ջասպեր շրջանի շերիֆի գրասենյակը Facebook-ի իր պաշտոնական էջում։ Դեպքը լուրջ անհանգստություն է առաջացրել տեղի բնակչության շրջանում, քանի որ կենդանիների վարքագիծը բնութագրվել է որպես խիստ ագրեսիվ։

Իշխանությունները հայտնել են, որ փախուստի դիմած կապիկների մեծ մասին հաջողվել է հայտնաբերել և վնասազերծել։ «Բացառությամբ մեկի, բոլոր փախուստի դիմած կապիկները ոչնչացվել են»,- նշվում է պաշտոնական հաղորդագրության մեջ։ Համալսարանը, որտեղից տեղափոխվում էին կենդանիները, փորձել է լիցքաթափել իրավիճակը՝ հայտարարելով, որ պրիմատները վարակիչ չեն եղել։ Սակայն այլ աղբյուրներ հակառակն են պնդում։

Ըստ որոշ տվյալների՝ Թուլեյնի համալսարանից դուրս բերված լաբորատոր մակակաները վարակված են եղել միանգամից մի քանի վտանգավոր հիվանդությամբ, այդ թվում՝ հեպատիտ C-ով և COVID-19-ով։ Այս տեղեկությունը հիմք է տալիս ենթադրելու, որ ազատության մեջ մնացած վերջին կապիկը կարող է լուրջ սպառնալիք ներկայացնել հանրային առողջության համար։ Տեղական իշխանությունները զգուշացնում են, որ մոտ 20 կգ քաշ ունեցող մակական ագրեսիվ է մարդկանց նկատմամբ։ Նրա որսի համար պահանջվում են անհատական պաշտպանության միջոցներ, քանի որ վարակվելու ռիսկերը չափազանց բարձր են։

Ներկայումս իրավապահները և մասնագետները շարունակում են որոնողական աշխատանքները՝ փորձելով գտնել վերջին կապիկին և կանխել հնարավոր համաճարակաբանական վտանգը։ Բնակիչներին հորդորել են զգոն լինել և կենդանուն նկատելու դեպքում անմիջապես տեղեկացնել իշխանություններին՝ խուսափելով նրա հետ ցանկացած շփումից։