ՀՀ ԱԳ նախարար Արարատ Միրզոյանը հարցազրույց է տվել Հանրային հեռուստատեսությանը։

«Մենք չենք ասում կնքվել է համաձայնագիր, այո, նախաստորագրվել է, գործողություններ կլինեն, սակայն ենթադրում եմ՝ հետագա ստորագրման, վավերացման փուլերն իրենց կշռով գուցե նույնիսկ չկարողանան գերազանցել նախաստորագրմանը»,-հայտարարեց Միրզոյանը։

«Նախաստորագրած պայմանագիրն ու ստորագրած հռչակագիրը բխում են և կառուցված են երկու երկրների համար փոխշահավետությունից»,-հայտարարեց Միրզոյանը՝ անդրադառնալով հարցին, թե աշխարհում շատ են եղել դեպքեր, երբ պայմանագրեր են խախտվել, այս դեպքում ո՞րն է երաշխիքը, որ օգոստոսի 8-ին նախաստորագրված Հայաստան-Ադրբեջան պայմանագիրը չի խախտվի։

Արտգործնախարարի պնդմամբ՝ երթուղին 99 տարով վարձակալության տալու մասին խոսակցությունները առայժմ իրականությանը չեն համապատասխանում.

«Ինչու եմ ասում առայժմ, որովհետև այն, ինչ հստակ է, գրված-հրապարակված է, մնացած մանրամասները դեռ պետք է քննարկվեն»,- ասաց նախարարը՝ շեշտելով, որ հողի սեփականության հարցը չի կարող վիճարկվել։

«ՀՀ սուվերեն տարածքներ կան, որոնք ադրբեջանական վերահսկողության տակ են, և նույն տրամաբանությամբ, նույն իրավական հիմքով, նույն քարտեզներով կան Ադրբեջանի տարածքներ, որոնք մեր վերահսկողության տակ են։ Մենք ունենք ըմբռնում, որ այս տարածքների վերադարձը պետք է տեղի ունենա սահմանազատման գործընթացի շրջանակում։ Ես խոսում եմ բոլոր տարածքների մասին»։

Նա նշել է, որ Վաշինգտոնում Սահմանադրության թեման չի քննարկվել, թեպետ Հայաստանը նախորդ շրջանից լսել է ադրբեջանական կողմի հայտարարությունները դրա վերաբերյալ։

«Մենք էլ խնդիրներ տեսնում ենք իրենց Սահմանադրության մեջ, բայց մենք կարծում ենք, որ [խաղաղության] պայմանագիրը կարող է այդ խնդիրները լուծել, իսկ սահմանադրությունները փոխելու կարիք չկա։

Մենք որեւէ երկրի առաջ մեր Սահմանադրությունը փոխելու պարտավորություն չենք ստանձնել, այն փոխելու մասին մենք խոսել ենք դեռ 2018-ից, այս խոսակցությանը ավելացել է Հռչակագրին հղում արվող կտորը»,- ասաց նախարարը։