Վաշինգտոնի պայմանագիրը փոխշահավետ է, սպասվում է սահմանազատում․ Միրզոյան

Օգոստոսի 8-ին Վաշինգտոնյան համաձայնություններով արձանագրվել է, որ Հայաստանի և Ադրբեջանի միջև այլևս խաղաղություն է։ Այդ մասին Հայաստանի հանրային հեռուստատեսությանը տված հարցազրույցում հայտարարել է ՀՀ արտգործնախարար Արարատ Միրզոյանը։

«Մենք չենք ասում կնքվել է, այո, նախաստորագրվել է, գործողություններ կլինեն, սակայն ենթադրում եմ՝ հետագա ստորագրման, վավերացման փուլերն իրենց կշռով գուցե նույնիսկ չկարողանան գերազանցել նախաստորագրմանը»,- նշել է նա։

Նախաստորագրված պայմանագիրն ու ստորագրված հռչակագիրը բխում են և կառուցված են Հայաստանի և Ադրբեջանի համար փոխշահավետությունից։ «Չկա մի դրույթ, որն էականորեն լավ է մի երկրի համար և էականորեն վատ է մյուսի համար»,- շեշտել է Միրզոյանը։

Ենթակառուցվածքներն ապաշրջափակվում են հետևյալ սկզբունքների ներքո՝ տարածքային ամբողջականության, այդ թվում՝ սահմանների անձեռնմխելիության, երկրների ինքնիշխանության և իրավազորության շրջանակներում և փոխադարձությամբ, հիշեցրել է արտգործնախարարը։

«Բոլոր անհրաժեշտ երաշխիքներն արձանագրված են։ Մինչև ենթակառուցվածքների բացումը պետք է լինի սահմանազատում, կառուցվի սահմանային անցակետ»,- ընդգծել է Միրզոյանը և հավելել, որ այն հողը, որով անցնելու է ենթակառուցվածքը ՀՀ տարածքում, որից օգտվելու են, այդ թվում՝ ադրբեջանական գնացքները, օրինակ, պատկանելու է ՀՀ-ին․ «99 տարվա մասին խոսակցություններն առայժմ իրականության հետ որևէ աղերս չունեն»։

Փորձում ենք ՀՀ-ն դարձնել ոչ թե շահերի բախման, այլ համագործակցության վայր, նշել է Արարատ Միրզոյանը՝ զգուշավոր լավատեսություն հայտնելով, որ Ադրբեջանի հետ հարաբերությունների կարգավորմանը զուգահեռ՝ որոշակի դրական տեղաշարժ կլինի նաև Թուրքիա-Հայաստան հարաբերություններում․ «Թուրքական կողմի հետ ևս դինամիկ երկխոսություն ունենք։ Ադրբեջանի հետ համաձայնագրի նախաստորագրումից հետո, տրամաբանությունը հուշում է ինձ, որ պետք է հետևի ՀՀ-Թուրքիա ենթակառուցվածքների ապաշրջափակում»։