ՄԻՊ-ը Քննչական կոմիտեում է՝ հոգևորականների գործով

Հայաստանի մարդու իրավունքների պաշտպանի աշխատակազմի արագ արձագանքման խումբը մեկնել է Քննչական կոմիտե՝ ազատությունից զրկված հոգևորականների իրավունքների ապահովման վիճակին և ազատությունից զրկելու հիմքերին տեղում ծանոթանալու նպատակով։ Այս մասին հայտնում են ՄԻՊ գրասենյակից:

Հոկտեմբերի 15-ին Հայ առաքելական եկեղեցու մի խումբ հոգևորականներ, այդ թվում՝ Արագածոտնի թեմի առաջնորդը, բերման են ենթարկվել Քննչական կոմիտե։ Իրավիճակին անմիջապես արձագանքել է Մարդու իրավունքների պաշտպանի գրասենյակը՝ տեղում իրավիճակին ծանոթանալու և ձերբակալվածների իրավունքները պաշտպանելու համար ուղարկելով արագ արձագանքման խումբ։ ՄԻՊ գրասենյակից հայտնել են, որ տեղեկությունը ստացել են լրատվամիջոցների մշտադիտարկման և փաստաբանի կողմից ստացված զանգի արդյունքում։ «Մարդու իրավունքների պաշտպանի հանձնարարությամբ աշխատակազմի արագ արձագանքման խումբը մեկնել է Քննչական կոմիտե՝ ազատությունից զրկված անձանց իրավունքների ապահովման վիճակին և ազատությունից զրկելու հիմքերին տեղում ծանոթանալու նպատակով»,- նշված է ՄԻՊ գրասենյակի տարածած հաղորդագրության մեջ:

Ավելի վաղ հայտնի էր դարձել 5 քահանաների՝ Տեր Փառենի, Տեր Մանուկի, Տեր Հայկի, Տեր Մկրտիչի, Տեր Ղևոնդի բերման ենթարկվելու մասին։ Նախորդ գիշեր խուզարկությունից հետո Քննչական կոմիտե է տեղափոխվել նաև Արագածոտնի թեմի առաջնորդ, Ամենայն հայոց կաթողիկոս Գարեգին Բ-ի քրոջ որդի Մկրտիչ եպիսկոպոս Պռոշյանը։ Մայր Աթոռից հայտնել են, որ տեղյակ չեն գործի մանրամասներից և բերման ենթարկված քահանաներից մեկի գտնվելու վայրից։

Ըստ փաստաբան Մարինե Ֆարմանյանի, գործընթացը կապված է Դանիել Իոաննիսյանի ներկայացրած հաղորդման հետ։ Վերջինս, հիմնվելով Տեր Արամի հարցազրույցի վրա, խնդրել է իրավապահներին ստուգել՝ «արդյոք հավաքներին մասնակցելու հարկադրանք եղել է, թե ոչ»։ Ըստ փաստաբանի՝ հոգևորականներին հենց այս գործի շրջանակներում են բերման ենթարկել։