Միջազգային իրավունքը չի գործում առանց հզոր ընկերների ու զենքի. Զելենսկի

ՄԱԿ-ի Գլխավոր ասամբլեայի ամբիոնից Ուկրաինայի նախագահ Վլադիմիր Զելենսկին հանդես է եկել ծրագրային և կոշտ ելույթով, որը ոչ թե օգնության խնդրանք էր, այլ գոյություն ունեցող աշխարհակարգի դաժան ախտորոշում և զգուշացում ապագայի պատերազմների մասին։ Նա հայտարարել է, որ միջազգային իրավունքն ու անվտանգության երաշխիքները դադարել են գործել, և այսօր գոյատևելու միակ բանաձևը հզոր դաշնակիցներ և սեփական զենք ունենալն է։

Զելենսկու ելույթի առանցքային մասը նվիրված էր պատերազմի փոփոխվող բնույթին։ Նա զգուշացրել է, որ աշխարհը թևակոխել է անօդաչու թռչող սարքերի (ԱԹՍ) դարաշրջան, որը հիմնովին փոխում է անվտանգության մասին բոլոր պատկերացումները։

Ուկրաինայի նախագահը նախազգուշացրել է, որ նույնիսկ պարզունակ դրոնները կարող են թռչել հազարավոր կիլոմետրեր, և սահմանափակ ռեսուրսներ ունեցող երկրներն այժմ կարող են ստեղծել իրենց հարևանների համար վտանգավոր զենք։

Այս նոր իրողության պայմաններում, ըստ Զելենսկու, Ուկրաինան այլընտրանք չի ունեցել, քան զարգացնել սեփական պաշտպանական արդյունաբերությունը։

Ավելին, Զելենսկին հայտարարել է ռազմավարության կտրուկ փոփոխության մասին. «Մենք որոշել ենք բացել զենքի արտահանումը։ Սրանք հզոր համակարգեր են՝ փորձարկված իրական աշխարհում, երբ բոլոր միջազգային ինստիտուտները ձախողվեցին։ Պետք չէ սկսել զրոյից. մենք պատրաստ ենք կիսվել նրանով, ինչն արդեն ապացուցել է իրեն իրական պաշտպանության մեջ»։

Զելենսկին ընդգծել է, որ ռուսական ագրեսիան սպառնում է ոչ միայն Ուկրաինային։ Նա զուգահեռներ է անցկացրել՝ նշելով, որ «Ռուսաստանը փորձում է Մոլդովայի հետ անել այն, ինչ Իրանը ժամանակին արեց Լիբանանի հետ», և ավելացրել՝ «Մենք Եվրոպայում արդեն կորցրել ենք Վրաստանը...»։ Որպես ուղիղ սպառնալիք ՆԱՏՕ-ին՝ նա նշել է 19 ռուսական ԱԹՍ-ների կողմից Լեհաստանի օդային տարածքի խախտման դեպքը, որոնցից միայն 4-ն է խոցվել։