Մարկ Գրիգորյանին կշնորհվի «Երևանի պատվավոր քաղաքացի» կոչում

Լրագրող, մանկավարժ, հասարակական և մշակութային գործիչ Մարկ Գրիգորյանին կշնորհվի «Երևանի պատվավոր քաղաքացի» կոչում։ Համապատասխան որոշման նախագիծը ներկայացվել է Երևանի ավագանու հոկտեմբերի 23-ի նիստում։

Մարկ Գրիգորյանը ծնվել է Երևանում, բանասիրական գիտությունների թեկնածու է։ Լրագրությամբ սկսել է զբաղվել 1993 թվականից՝ աշխատելով որպես «Սվոբոդա» թերթի խմբագրի տեղակալ, այնուհետև՝ Լոնդոնում՝ BBC-ի ռուսական ծառայությունում։ Նա իր գործունեության զգալի մասը նվիրել է Երևանին։

2015-2017 թվականներին հեղինակել և վարել է «Անծանոթ Երևան» հաղորդաշարը, որտեղ ներկայացրել է մայրաքաղաքի զարգացման պատմությունը, նշանակալի շենքերն ու դրանց ճարտարապետներին։

2017-2018 թվականներին ղեկավարել է Հայաստանի հանրային ռադիոընկերությունը, իսկ 2019-2024 թվականներին՝ Ճարտարապետության ազգային թանգարան-ինստիտուտը։ Ճարտարապետ Մարկ Գրիգորյանի թոռը լինելով՝ նա աշխատությունների և հոդվածների հեղինակ է, որտեղ անդրադարձել է Երևանի ճարտարապետության խնդիրներին ու հեռանկարներին։