Ես կշարունակեմ ծառայել. Մակրոնը մերժում է հրաժարականի կոչերը

Ֆրանսիայի նախագահ Էմանուել Մակրոնը, գտնվելով Եգիպտոսում, Գազայի հարցով խաղաղության գագաթնաժողովին մասնակցելու նպատակով, հանդես է եկել հայտարարությամբ՝ հայտնելով, որ մտադիր է շարունակել իր պաշտոնավարումը։ Ըստ նրա, նպատակը երկրում կայունություն ապահովելն է։ Այսպիսով, նա ոչ միայն անտեսել է ընդդիմության կողմից շարունակաբար հնչող հրաժարականի կոչերը, այլև ուղղակիորեն մեղադրել է նրանց երկրում ստեղծված «անկարգ վիճակիի» համար։

Լրագրողների հետ զրույցում Մակրոնը ընդգծել է իր մանդատի բուն էությունը՝ այն դիտարկելով որպես պարտավորություն ֆրանսիացի ժողովրդի առջև։ «Երբեք մի՛ մոռացեք, որ ֆրանսիացի ժողովրդի կողմից տրված մանդատը ծառայելն է, ծառայելն ու ծառայելը, և պատասխաններ տալը հասարակ ֆրանսիացիների առօրյա հարցերին, ինչպես նաև ամեն ինչ անելը Ֆրանսիայի անկախության համար»,- հայտարարել է նա։

Սակայն այս անգամ Մակրոնը չի սահմանափակվել միայն իր առաքելությունը վերահաստատելով։ Նա անցել է հակահարձակման՝ անդրադառնալով ներքաղաքական ճգնաժամին, որի դրսևորումներից էր վարչապետ Սեբաստիան Լըկորնյուի հրաժարականը։ Ֆրանսիայի նախագահի խոսքով՝ այն քաղաքական ուժերը, որոնք դեր են խաղացել վարչապետի հրաժարականի գործում, «լիակատար պատասխանատվություն են կրում այս անկարգությունների համար»։ Այս հայտարարությամբ նա հստակ ցույց է տալիս, որ ճգնաժամի պատճառը համարում է ոչ թե իր կամ իր կառավարության քաղաքականությունը, այլ ընդդիմության գործողությունները։

Մակրոնը հստակ սահմանազատում է դրել իր և կառավարության գործառույթների միջև՝ իր վրա վերցնելով պետության կայունության երաշխավորի դերը։

«Սա է միակ բանը, որն ունի նշանակություն։ Մնացածը կառավարության գործն է... Ես կշարունակեմ ապահովել կայունությունը»,— հավելել է Մակրոնը, ում երկրորդ և վերջին նախագահական ժամկետը լրանում է 2027 թվականին։

Այսպիսով, գտնվելով միջազգային կարևորության գագաթնաժողովում, Ֆրանսիայի նախագահը հստակ ուղերձ է հղում ինչպես իր ներքաղաքական հակառակորդներին, այնպես էլ ֆրանսիական հասարակությանը։ Նա ցույց է տալիս, որ չնայած ներքին ճնշմանը, մտադիր չէ տեղի տալ և իր պարտքն է համարում մինչև իր լիազորությունների ավարտը կատարել այն առաքելությունը, որի համար ընտրվել է՝ կենտրոնանալով երկրի երկարաժամկետ շահերի և կայունության ապահովման վրա։