Մակրոնը 48 ժամում նոր վարչապետ կնշանակի

Ֆրանսիայի նախագահ Էմանուել Մակրոնը 48 ժամվա ընթացքում կնշանակի նոր վարչապետ։ Այդ մասին հոկտեմբերի 8-ին հայտարարել է Ելիսեյան պալատը՝ հերքելով նոր ընտրություններ անցկացնելու հնարավորության մասին ենթադրությունները։

Ավելի վաղ Ֆրանսիայի վարչապետի պաշտոնակատար Սեբաստիան Լըկորնյուն էր հոկտեմբերի 8-ին հայտարարել, որ խորհրդարանի արձակման հավանականությունը նվազել է՝ քաղաքական տարբեր կուսակցությունների հետ անցկացրած բանակցությունների արդյունքում։ Նրա խոսքով, քննարկումները ցույց են տվել, որ կա ընդհանուր պատրաստակամություն՝ մինչև տարեվերջ բյուջեի նախագիծն ընդունելու համար։

«Այս պատրաստակամությունը ստեղծում է համերաշխություն, որն, ակնհայտորեն, ավելի հեռու է մղում խորհրդարանը ցրելու հնարավորությունը», - ասել է Լըկորնյուն՝ Փարիզի Մատինյոնի պալատի բակում իր ելույթի ժամանակ։

Այս հայտարարությունը հնչում է Ֆրանսիայի համար քաղաքական խորը ճգնաժամի ֆոնին, որը սկիզբ առավ այն բանից հետո, երբ նախագահ Էմանուել Մակրոնը նախորդ տարի արտահերթ ընտրություններ նշանակեց՝ խորհրդարանում իր դիրքերն ամրապնդելու հույսով։ Սակայն ընտրությունների արդյունքը եղավ ավելի մասնատված օրենսդիր մարմին, ինչը երկիրը ներքաշեց քաղաքական քաոսի մեջ։

Լըկորնյուն, ով վերջին երկու տարվա ընթացքում Ֆրանսիայի հինգերորդ վարչապետն է, իր և իր կառավարության հրաժարականի մասին հայտարարել էր հոկտեմբերի 6-ին, սակայն նախագահ Մակրոնը նրան խնդրել էր շարունակել պաշտոնավարել՝ ճգնաժամի հանգուցալուծման ուղիներ գտնելու նպատակով։

Վարչապետի պաշտոնակատարը նշել է, որ քաղաքական ուժերի հետ քննարկումները ցույց են տվել նաև, որ կա ընդհանուր համաձայնություն՝ հաջորդ տարվա բյուջեի դեֆիցիտը պահպանել ՀՆԱ-ի 5%-ից ցածր մակարդակի վրա, ինչը կարևոր է Ֆրանսիայի վարկանիշի համար։

Լըկորնյուն, ով նախատեսում էր բանակցությունների արդյունքները քննարկել նախագահ Էմանուել Մակրոնի հետ, հույս է հայտնել, որ հնարավոր կլինի գտնել լուծումներ և կառուցողական ճանապարհ առաջարկել նախագահին։