Քննարկվել է Լոս Անջելես-Երևան ուղիղ թռիչքների հնարավորությունը

Նոյեմբերի 13-ին ԱՄՆ-ում ՀՀ դեսպան Նարեկ Մկրտչյանը հանդիպում է ունեցել United Airlines-ի Միջազգային համագործակցության հարցերով տնօրեն Չաիթան Ջեյնի հետ։ Այս մասին հայտնում է դեսպանությունը:

Հանդիպման ընթացքում կողմերը քննարկել են Լոս Անջելես-Երևան ուղղությամբ ուղիղ թռիչքների հնարավորությունը։ Դեսպան Մկրտչյանն ընդգծել է ուղիղ չվերթի կարևորությունը Հայաստանի համար՝ հաշվի առնելով հայ սփյուռքի զգալի ներկայությունը հատկապես Լոս Անջելեսում։

Միաժամանակ, Չայթան Ջեյնը ներկայացրել է United Airlines-ի ռազմավարական առաջնահերթությունները, ոլորտի վերջին միտումները և գործառնական պայմանները։

Ավելի վաղ այս հարցը դեսպանը քննարկել էր նաև ԱՄՆ խոշորագույն «Delta Air Lines» ավիաընկերության փոխնախագահ Բոբ Լեթենեյի և միջազգային կապերի և քաղաքականության գծով տնօրեն Ռոնք Ադեբիյիի հետ, հայտնում են դեսպանությունից։