Խորթ եղբայրը դատարանում փորձել է վրեժ լուծել որդու սպանության համար

Լոռու մարզում տեղի ունեցած դատական նիստի ժամանակ սպանված 21-ամյա երիտասարդի խորթ եղբայրը դանակով հարվածներ է հասցրել իր եղբոր սպանության մեջ գլխավոր ամբաստանյալներից մեկին՝ Էրիկ Դադիվանյանին, որից հետո դիմել է փախուստի։

Ըստ լրատվամիջոցներում տարածված տեղեկությունների՝ ողբերգական դեպքը տեղի է ունեցել 2024 թվականի հուլիսի 9-ի լույս 10-ի գիշերը Ստեփանավանում։ Չորս ամբաստանյալ վիճաբանության ընթացքում բութ, կոշտ և կտրող գործիքներով առնվազն 5 հարված են հասցրել Հայկ Մաղաքյանի գլխին և որովայնին, ինչի հետևանքով վերջինս մահացել է։

Դրանից հետո ամբաստանյալ Էրիկ Դադիվանյանը, Գոռ Նազարյանի և ևս մեկ՝ դեռևս չպարզված անձի հետ, Մաղաքյանի դին բնակարանից տեղափոխել են «Գորոդոկ» կոչվող վայր։ Այնտեղ նրանք թաքցրել են դին՝ մասամբ այրելով նրա հագուստը և մարմինը ծածկելով հողով ու քարերով։

Հոկտեմբերի 27-ին կայացած դատական նիստի ժամանակ է տեղի ունեցել վրեժխնդրության փորձը։ Քրեական հետախուզության պետական վարչությունից լրատվամիջոցներին հայտնել են, որ դանակահարված Դադիվանյանը վիրահատվել է, և նրա վիճակը գնահատվում է կայուն։