Լոնդոնում զանգվածային հակամիգրանտական ցույցը վերածվել է բախումների

Լոնդոնում սեպտեմբերի 13-ին տեղի է ունեցել վերջին տարիների ամենամեծ հակամիգրանտական ցույցը: Ոստիկանության տվյալներով՝ փողոցներ է դուրս եկել մինչև 150 հազար մարդ: Ակցիան կազմակերպել է աջակողմյան ակտիվիստ Թոմի Ռոբինսոնը, ով այն անվանել է «խոսքի ազատության հանրահավաք»:

Բրիտանական դրոշներով ցուցարարները պահանջել են Կիր Սթարմերի կառավարության հրաժարականը և միգրանտների հոսքի սահմանափակում:

Խաղաղ երթը արագ վերածվել է բախումների. մասնակիցները սկսել են ոստիկանության վրա նետել շշեր և ծխագլանակներ: Պաշտոնական տվյալներով՝ տուժել է 26 ոստիկան, որոնցից չորսը ստացել են ծանր վնասվածքներ:

Ոստիկանների մոտ ախտորոշվել են կոտրվածքներ, գլխուղեղի ցնցում և ատամների կորուստ: Արդեն ձերբակալվել է 25 մարդ, սակայն, ինչպես նշում է ոստիկանությունը, ձերբակալությունների թիվը կավելանա:

Ինքը՝ Ռոբինսոնը, ով Բրիտանիայում հայտնի է իր ծայրահեղական ակցիաներով և բազմաթիվ դատվածություններով, հայտարարել է «մշակութային հեղափոխության» մեկնարկի մասին և խոստացել, որ «լռակյաց մեծամասնությունն այլևս չի լռի»:

Նրան աջակցել են հայտնի աջակողմյան քաղաքական գործիչներ, այդ թվում՝ Դոնալդ Թրամփի նախկին խորհրդական Սթիվ Բենոնը և ֆրանսիացի հրապարակախոս Էրիկ Զեմմուրը:

Միաժամանակ փողոցներ են դուրս եկել ակցիայի մոտ 5000 հակառակորդներ: Ցույցը անցկացվել է «Ոչ ատելության» կարգախոսով, և դրա մասնակիցների թվում է եղել Լեյբորիստական կուսակցությունից պատգամավոր Դիանա Էբբոթը, ով Ռոբինսոնի հայտարարությունները անվանել է «վտանգավոր անհեթեթություն»: