Լեհաստանը խոցել է 10 «Շահեդ» ԱԹՍ և զորակոչ հայտարարել

Լեհաստանն առաջին անգամ խոցել է «Շահեդ» անօդաչու թռչող սարքեր. հաղորդվում է 10 խոցված ԱԹՍ-ի մասին: Դրոնների ներխուժման պատճառով Լեհաստանը հայտարարել է պահեստազորի շտապ զորակոչ:

Ըստ ԶԼՄ-ների և մոնիթորինգային ալիքների տվյալների՝ Լեհաստանի օդային տարածք է մուտք գործել առնվազն 10 անօդաչու թռչող սարք:

Լեհաստանի զինված ուժերը սա որակել են որպես ագրեսիայի ակտ և սահմանների աննախադեպ խախտում:

BBC-ն նշում է, որ այս «օբյեկտների» խոցումը կարող է դառնալ Ռուսաստանի՝ Ուկրաինայի դեմ պատերազմի նոր փուլ:

Լրագրողները ընդգծում են, որ սա կարող է լինել 2022 թվականից ի վեր առաջին դեպքը, երբ ՆԱՏՕ-ի անդամ երկիրը ուղղակիորեն առնչվել է ռուսական սպառնալիքի հետ:

Լեհաստանն արագացված կարգով զորակոչ է հայտարարել տարածքային պաշտպանության պահեստազորի համար՝ ԱԹՍ-ների հետ կապված միջադեպերի պատճառով,-հայտնում են ուկրաինական ԶԼՄ-ները:

Այլ պետական ծառայություններ նույնպես բերվել են բարձր պատրաստվածության վիճակի:

Անօդաչուների ներխուժման պատճառով ժամանակավորապես դադարեցվել է չորս օդանավակայանների աշխատանքը։

Չեն աշխատում Վարշավայի գլխավոր՝ Շոպենի անվան օդանավակայանը, ինչպես նաև Վարշավա-Մոդլին, Ժեշուվ-Յասիոնկա (Ուկրաինային ամենամոտ) և Լյուբլին օդանավակայանները: