Մարին Լը Պենը պահանջում է Մակրոնի հրաժարականը

Ֆրանսիայում շարունակվող քաղաքական ճգնաժամի ֆոնին «Ազգային միավորում» կուսակցության առաջնորդ Մարին Լը Պենը հանդես է եկել կոշտ հայտարարությամբ՝ պահանջելով ոչ միայն նորանշանակ վարչապետի, այլև անմիջապես նախագահ Էմանուել Մակրոնի հրաժարականը։

Նրա խոսքով, վարչապետ Սեբաստիեն Լեկորնուի հրաժարականը վկայում է այն մասին, որ քաղաքական համակարգը հասել է վերջնական փակուղու։ «Մենք հասել ենք ճանապարհի վերջին։ Ոչ մի լուծում չկա, և վաղը այն չի հայտնվի», - հայտարարել է Լը Պենը՝ ընդգծելով, որ ներկայիս խորհրդարանական կազմով անհնար է հաղթահարել ճգնաժամը և ապահովել երկրի կայուն կառավարումը։

Որպես ստեղծված իրավիճակից միակ ելք՝ Լը Պենը նախագահ Մակրոնին կոչ է արել դիմել վճռական քայլի՝ ցրել Ազգային ժողովը և նշանակել արտահերթ խորհրդարանական ընտրություններ։

«Հինգերորդ Հանրապետության սահմանադրությամբ նախատեսված միակ իմաստուն որոշումը այս պայմաններում՝ վերադառնալ քվեատուփերին և թույլ տալ ֆրանսիացիներին որոշել երկրի հետագա ուղին», - եզրափակել է նա։

Հիշեցնենք, որ Մակրոնն արդեն մեկ անգամ գնացել է արտահերթ խորհրդարանական ընտրությունների, սակայն դրանց արդյունքում ավելի է թուլացրել իր դիրքերը Ազգային ժողովում։ Հաշվի առնելով իշխող ուժի հանդեպ աճող դժգոհությունը, շատ փորձագետներ այն համոզմանն են, որ նոր ընտրությունների դեպքում ևս Մակրոնը հաջողության հասնելու առանձնապես մեծ շանսեր չունի։