Թրամփի հետ գագաթնաժողովի տապալումը կարող է վերջ դնել Լավրովի կարիերային

Ռուսաստանի արտգործնախարար Սերգեյ Լավրովը, ով ավելի քան երկու տասնամյակ համարվում էր Կրեմլի արտաքին քաղաքականության անփոխարինելի դեմքը, ըստ ամենայնի, հայտնվել է լուրջ հարվածի տակ։ Նրա դիրքերի կտրուկ թուլացման պատճառ է դարձել ԱՄՆ պետքարտուղար Մարկո Ռուբիոյի հետ անհաջող հեռախոսազրույցը, որին հետևել է նախագահներ Վլադիմիր Պուտինի և Դոնալդ Թրամփի միջև ծրագրված գագաթնաժողովի տապալումը։

Լավրովի նկատմամբ Կրեմլի դժգոհության առաջին տեսանելի նշանը դարձավ նրա բացակայությունը նոյեմբերի 5-ին կայացած Անվտանգության խորհրդի սկզբունքային նշանակության նիստին։ Հենց այդ նիստի ժամանակ Պուտինը հանձնարարեց մշակել միջուկային փորձարկումների վերսկսման վերաբերյալ առաջարկներ, որոնք Ռուսաստանը չի իրականացրել 1990 թվականից ի վեր։ Թեև «Կոմերսանտի» աղբյուրը նշել է, որ 76-ամյա Լավրովը «համաձայնեցված բացակայել է», սակայն ուշագրավ է, որ նա ԱԽ մշտական անդամներից միակն էր, ով ներկա չէր նիստին։

Սակայն ամենացավոտ հարվածը դարձավ G20-ի գագաթնաժողովում ռուսական պատվիրակության ղեկավարի կարգավիճակից նրան զրկելը։ Կրեմլի խոսնակ Դմիտրի Պեսկովը հայտարարեց, որ այս տարի պատվիրակությունը կգլխավորի նախագահի աշխատակազմի ղեկավարի տեղակալ Մաքսիմ Օրեշկինը, և որ այդ որոշումը կայացրել է անձամբ Պուտինը։

Սա խիստ անսովոր որոշում է, քանի որ նախկինում, երբ Պուտինը խուսափում էր միջազգային գագաթնաժողովներից Միջազգային քրեական դատարանի կողմից իր ձերբակալության օրդերի պատճառով (ինչպես 2022-ին Բալիում, կամ 2025-ին Բրազիլիայում), ռուսական պատվիրակությունը մշտապես գլխավորում էր հենց Լավրովը։

Իրադարձությունների այս շղթայի մեկնարկը դրվեց հոկտեմբերի 21-ին, երբ Լավրովը հեռախոսազրույց ունեցավ Ռուբիոյի հետ՝ Բուդապեշտում կայանալիք Պուտին-Թրամփ հանդիպման պայմանները քննարկելու համար։ Սակայն բանակցություններն ակնհայտորեն ձախողվեցին. Ռուբիոն Թրամփին խորհուրդ տվեց չեղարկել հանդիպումը, ինչին հաջորդեցին ԱՄՆ նոր պատժամիջոցները «Ռոսնեֆտի» և «Լուկօյլի» դեմ՝ առաջինը Թրամփի՝ Սպիտակ տուն վերադառնալուց հետո։ Այս ձախողումը, ինչպես երևում է, Կրեմլում անհետևանք չի մնացել ռուսական դիվանագիտության վետերանի համար։