Կրակոցներ Սպիտակում․ ձերբակալվել է 7 մարդ

Հոկտեմբերի 14-ի երեկոյան, Լոռու մարզի Սպիտակ քաղաքում կրակոցներ են հնչել։ Մի խումբ անձանց միջև ծագած վիճաբանությունն ու ծեծկռտուքն ավարտվել է 7 հոգու ձերբակալությամբ։ Միջադեպը տեղի է ունեցել Ազգային ժողովի նախկին պատգամավոր, գործարար Արկադի Համբարձումյանի տան մոտ։

Ժամը 20:30-ի սահմաններում ոստիկանությունում օպերատիվ տեղեկություններ են ստացվել, որ Սպիտակում վիճաբանություն է տեղի ունեցել, որի ժամանակ հնչել են կրակոցներ։ Shamshyan.com-ի տեղեկություններով՝ «վիճաբանությունը, ծեծկռտուքը և կրակոցները տեղի են ունեցել» ԱԺ նախկին պատգամավոր, հանրությանը «Դերժավայի Արկադի» անունով հայտնի Արկադի Համբարձումյանի տան մոտ։

Դեպքի վայր ժամանած ոստիկանության բազմաթիվ ստորաբաժանումների աշխատակիցները խուլիգանություն կատարելու կասկածանքով ձերբակալել են 7 անձի։ Ձերբակալվածներից մեկը հենց Արկադի Համբարձումյանի որդին է։

Փաստի առթիվ ՀՀ քննչական կոմիտեի Լոռու մարզային քննչական վարչության Սպիտակի բաժնում նախաձեռնվել է քրեական վարույթ։ Նախաքննությունը շարունակվում է՝ միջադեպի բոլոր հանգամանքները պարզելու ուղղությամբ։