Բաքուն բողոքի նոտա է հանձնել Մոսկվային. Զելենսկին զրուցել է Ալիևի հետ

Կիևի գիշերային զանգվածային հրթիռակոծությունը Ռուսաստանի կողմից հանգեցրել է լուրջ դիվանագիտական սկանդալի։ Հարվածներից մեկի հետևանքով վնասվել է Ուկրաինայում Ադրբեջանի դեսպանատան շենքը, ինչն առաջացրել է Բաքվի կոշտ արձագանքը և ամրապնդել Կիևի ու Բաքվի միջև համագործակցությունը։

Ի պատասխան միջադեպի՝ Ադրբեջանում Ռուսաստանի Դաշնության արտակարգ և լիազոր դեսպան Միխայիլ Եվդոկիմովը կանչվել է երկրի Արտաքին գործերի նախարարություն։ Ինչպես հաղորդում են ադրբեջանական լրատվամիջոցները, ռուս դիվանագետին խիստ բողոքի նոտա է հանձնվել։ Բաքուն կտրուկ բողոք է հայտնել այն փաստի կապակցությամբ, որ Կիևի վրա արձակված «Իսկանդեր» հրթիռներից մեկն ընկել է դեսպանատան տարածքում։ Արդյունքում զգալի վնաս է հասցվել դիվանագիտական ներկայացուցչությանը և ծառայողական մեքենաներին։

Միջադեպի առնչությամբ հեռախոսազրույց են ունեցել Ուկրաինայի և Ադրբեջանի նախագահներ։ Իր սոցիալական ցանցերի էջում Զելենսկին երախտագիտություն է հայտնել Ալիևին՝ ցուցաբերած աջակցության և ցավակցության համար։

Բացի միջադեպի քննարկումից, երկու երկրների ղեկավարներն անդրադարձել են նաև երկկողմ հարաբերությունների զարգացմանը։ Զելենսկու խոսքով՝ այս զրույցը նոր խթան է հաղորդել համագործակցությանը։

«Մեր երկկողմ համագործակցության բոլոր ուղղություններով իսկապես կանաչ լույս է տրվել։ Ներուժը հսկայական է, և մենք այն կյանքի կկոչենք։ Շնորհակալ եմ», - եզրափակել է Ուկրաինայի նախագահը՝ ընդգծելով, որ այս իրադարձությունը, չնայած իր ողբերգական բնույթին, հիմք է դարձել երկու երկրների միջև գործընկերության հետագա խորացման համար։