Ուկրաինայում հրետակոծվել է մանկական հիվանդանոցը. կան տուժածներ

Ուկրաինայի Խերսոն քաղաքը հերթական անգամ ենթարկվել է հրետանային հարձակման, որի թիրախում այս անգամ հայտնվել է նաև մանկական հիվանդանոցը։ Հոկտեմբերի 29-ի առավոտյան ռուսական զորքերը հարված են հասցրել քաղաքի Դնեպրովսկի շրջանին, ինչի հետևանքով զգալի վնասներ է կրել բժշկական հաստատություններից մեկը։ Այս մասին հայտնել է մարզային զինվորական վարչակազմի ղեկավար Ալեքսանդր Պրոկուդինը։

Իր տելեգրամյան ալիքում նա գրել է, որ տուժածների թվում կան ինչպես հիվանդանոցի աշխատակիցներ, այնպես էլ երեխա։ «Տուժածների թվում կա երեք աշխատակից և երեխա։ Իննամյա աղջիկը ստացել է ականապայթյունային վնասվածք և սրունքի բեկորային վիրավորում», - նշել է Պրոկուդինը։ Նրա խոսքով, բուժհաստատության աշխատակիցները ստացել են տարբեր աստիճանի ծանրության պայթյունային վնասվածքներ և վիրավորումներ։

Ավելի ուշ Խերսոնի մարզային դատախազությունը ճշտել է, որ հրետակոծության թիրախը եղել է հենց մանկական հիվանդանոցը, և ներկայացրել է տուժածների ավելի մեծ թիվ։ «Հրետակոծության հետևանքով, նախնական տվյալներով, տուժել է ինը մարդ, որոնց թվում՝ չորս երեխա և երեք բուժաշխատող», - ասված է դատախազության հաղորդագրության մեջ։ Գերատեսչությունից հայտնել են, որ հիվանդանոցի շենքը լրջորեն վնասվել է, իսկ պայթյունի ալիքից վնասվել են նաև մոտակա շինությունները։

Ըստ ուկրաինական կողմի քննության տվյալների՝ ռուսական զինվորականները առավոտյան ժամը 09:20-ի սահմաններում «հրետանային կրակ են բացել Խերսոնի մանկական հիվանդանոցի ուղղությամբ, որտեղ այդ պահին գտնվել են փոքրիկ հիվանդներ, նրանց ծնողները և բուժանձնակազմը»։

Ռուսական կողմը այս հայտարարությունը, ինչպես և Խերսոնի նախորդ հրետակոծությունները, չի մեկնաբանել։ Քաղաքը փաստացի գտնվում է ռազմաճակատի գծում, որը բաժանված է Դնեպր գետով։ Գետի մյուս ափը գտնվում է ռուսական ուժերի վերահսկողության տակ։ Կողմերը պարբերաբար միմյանց մեղադրում են փոխադարձ հրետակոծությունների մեջ։