Ռուսաստանը չի հաղթում այս պատերազմում. Քիթ Քելլոգ

ԱՄՆ նախագահի հատուկ ներկայացուցիչ Քիթ Քելոգը Fox News-ին տված հարցազրույցում հայտարարել է, որ Ռուսաստանը չի հաղթում Ուկրաինայի դեմ պատերազմում, և որ ԱՄՆ-ի դիրքորոշումը փոխվել է՝ թույլատրելով Ուկրաինային հեռահար հարվածներ հասցնել Ռուսաստանի խորքային թիրախներին։ Այս համատեքստում նա հաստատել է, որ նախագահ Զելենսկին նախագահ Թրամփից խնդրել է Tomahawk թևավոր հրթիռներ։

Քելոգի գնահատմամբ՝ պատերազմը, որն ըստ էության սկսվել է 2014 թվականին՝ Օբամայի օրոք, և սրվել 2022-ին՝ Բայդենի օրոք, «Թրամփի պատերազմը չէ»։ Նրա խոսքով՝ Թրամփը ժառանգել է այս հակամարտությունը և ամեն ինչ անում է այն ավարտին հասցնելու համար՝ բանակցելով կողմերի և դաշնակիցների հետ։

Ներկայացնելով հետախուզական տվյալները՝ Քելոգը պնդել է. «Ռուսաստանը չի հաղթում այս պատերազմում։ Եթե նրանք հաղթեին, կլինեին Կիևում, Օդեսայում, կանցնեին Դնեպրը»։ Փոխարենը, ըստ նրա, Ռուսաստանը ստացավ ՆԱՏՕ-ի ընդլայնում. Ֆինլանդիան կրկնապատկեց սահմանի երկարությունը, որը Ռուսաստանը պետք է պաշտպանի, իսկ Շվեդիան՝ տեխնոլոգիապես զարգացած երկիրը, միացավ դաշինքին։

Քելոգը նաև ընդգծել է հակամարտության լրջությունը՝ այն անվանելով Երկրորդ համաշխարհային պատերազմից ի վեր Եվրոպայում տեղի ունեցած ամենախոշոր պատերազմը, որի զոհերի թիվն արդեն գերազանցում է մեկ միլիոնը։ Նա իր մտահոգությունն է հայտնել հնարավոր սխալի հետևանքով լայնամասշտաբ էսկալացիայի ռիսկի վերաբերյալ, ինչպիսիք կարող են լինել անօդաչուների հարվածները Լեհաստանին կամ ինքնաթիռների թռիչքները Էստոնիայի վրայով։

Ի պատասխան լրագրողի ճշտող հարցին, թե արդյոք Ուկրաինան արդեն ունի նախագահի թույլտվությունը՝ հեռահար հարվածներ հասցնելու Ռուսաստանի տարածքին, Քելոգը պատասխանել է դրական։ Նա նշել է, որ եթե ուշադիր լինենք նախագահ Թրամփի, փոխնախագահ Վենսի և պետքարտուղար Ռուբիոյի հայտարարություններին, ապա պատասխանը «այո» է։

Որպես այս քաղաքականության փոփոխության վկայություն՝ նա նշել է նախագահ Զելենսկու կողմից Tomahawk թևավոր հրթիռներ տրամադրելու խնդրանքը, որոնք ունակ են խորքային հարվածներ հասցնել։ Քելոգը հաստատել է, որ խնդրանքը եղել է, սակայն վերջնական որոշումը դեռ կայացված չէ և կախված է նախագահից։