Ջրամբարի վրա ուկրաինական հարվածի հետևանքով հեղեղման վտանգ կա

Բելգորոդի մարզի նահանգապետ Վյաչեսլավ Գլադկովը հայտարարել է, որ ուկրաինական հրթիռային հարվածի հետևանքով Սևերսկի Դոնեց գետի վրա գտնվող Բելգորոդի ջրամբարի ամբարտակը վնասվել է։ Այս կապակցությամբ իշխանությունները հնարավոր տարհանման նախապատրաստական աշխատանքներ են սկսել՝ մոտակա բնակավայրերի համար հեղեղումների վտանգի պատճառով։

«Ուկրաինայի Զինված ուժերի հարվածի հետևանքով Բելգորոդի ջրամբարի ամբարտակին վնաս է հասցվել։ Մենք հասկանում ենք, որ թշնամին կարող է փորձել ևս մեկ անգամ հարվածել և ոչնչացնել ամբարտակը։ Եթե դա տեղի ունենա, ապա կառաջանա Խարկովի մարզի կողմից գետի հարակից տարածքների և մեր բնակավայրերի մի քանի փողոցների ջրածածկման վտանգ, որտեղ բնակվում է մոտ 1000 մարդ», - գրել է նա իր տելեգրամյան ալիքում։

Տեղի բնակչության շրջանում «Բելգորոդի ծով» անվանումը ստացած ջրամբարի մոտ գտնվող բնակավայրերի բնակիչներին առաջարկվում է տարհանվել Բելգորոդ և տեղավորվել քաղաքային ժամանակավոր կացության կետերում։

Գլադկովի խոսքով՝ իշխանությունները սկսել են կապ հաստատել այն մարդկանց հետ, որոնց անմիջականորեն սպառնում է ջրհեղեղը, և որոնք ժամանակավոր վերաբնակեցման այլ հնարավորություն չունեն։ Խոսքը, մասնավորապես, վերաբերում է Բեզլյուդովկա, Նովայա Տավոլժանկա և Շեբեկինո գյուղերին։

Նշենք, որ Բելգորոդի ջրամբարի ընդհանուր ծավալը կազմում է մոտ 76 միլիոն խորանարդ մետր, ինչը լրացուցիչ մտահոգությունների տեղիք է տալիս ամբարտակի ամբողջական ավերման դեպքում հնարավոր հետևանքների վերաբերյալ։