Իսրայելը հրամայում է Գազայի բնակիչներին տարհանվել դեպի հարավ

Սեպտեմբերի 9-ին Իսրայելի զինվորականները հրամայել են Գազայի քաղաքի բնակիչներին տարհանվել՝ նոր հարձակումից առաջ։ Իսրայելը զգուշացրել է, որ կուժեղացնի ռազմական հարձակումները սեկտորում, եթե ՀԱՄԱՍ-ը չազատի իր ձեռքում գտնվող վերջին պատանդներին:

«Ես ասում եմ Գազայի բնակիչներին՝ օգտվեք այս հնարավորությունից և ուշադիր լսեք ինձ. Ձեզ զգուշացրել են՝ դուրս եկեք այնտեղից», - ասել է Իսրայելի վարչապետ Բենյամին Նեթանյահուն:

Տարհանման հրամանը խուճապ և շփոթություն է առաջացրել սեկտորի ամենամեծ քաղաքային կենտրոնի բնակիչների շրջանում: Ոմանք ասել են, որ ստիպված կլինեն հեռանալ դեպի հարավ, բայց շատերն ասել են, որ կմնան, քանի որ ոչ մի այլ վայրում իրենք ապահով չեն զգում:

Գազայի բնակիչներն արդեն մի քանի անգամ տեղահանվել են 2023 թվականի հոկտեմբերին սկսված պատերազմից ի վեր՝ տեղափոխվելով ափամերձ անկլավի հյուսիսից հարավ՝ վատթարացող հումանիտար ճգնաժամի պայմաններում, որը հանգեցրել է սովի: Այս անգամ Իսրայելի զինվորականները Գազայի քաղաքի բնակիչներին հրահանգել են տեղափոխվել Խան Յունիսի հարավային Ալ-Մավասի տարածք, որը նրանք նշանակել են որպես «հումանիտար գոտի»:

Նեթանյահուն ասել է, որ իսրայելական ուժերը կազմակերպվում և հավաքվում են Գազայի քաղաքում՝ ցամաքային «մանևրի» համար: Պաշտպանության նախարար Իսրայել Կացը հայտարարել է, որ զինվորականները կուժեղացնեն իրենց արշավը «հզոր փոթորիկով», եթե ՀԱՄԱՍ-ը չազատի վերջին պատանդներին և չհանձնվի: Քաղաքի գրավումը բարդացնում է գրեթե երկու տարի տևած պատերազմը դադարեցնելու հաշտության ջանքերը:

ՀԱՄԱՍ-ը հայտարարել է, որ ստացել է որոշ գաղափարներ ԱՄՆ-ի կողմից՝ Գազայում հաշտության գործարքի հասնելու համար, և քննարկում է միջնորդների հետ այդ գաղափարները զարգացնելու ուղիները: Իսրայելը ընդունել է ԱՄՆ նախագահ Դոնալդ Թրամփի կողմից առաջարկված հաշտության առաջարկը, հայտարարել է Իսրայելի արտաքին գործերի նախարար Գիդեոն Սաարը սեպտեմբերի 8-ին:

Հարձակումը տեղի է ունենում այն ժամանակ, երբ մի քանի եվրոպական երկրներ, զայրացած Իսրայելի կողմից Գազայի ռմբակոծություններից, հայտարարել են, որ այս ամիս ՄԱԿ-ի Գլխավոր ասամբլեայում կճանաչեն Պաղեստինի պետականությունը, մի քայլ, որը Իսրայելը մերժում է:

Միջազգային քննադատները ասում են, որ Իսրայելի ծրագիրը, որը ներառում է ամբողջ սեկտորի ապառազմականացումը, կարող է խորացնել 2,2 միլիոն բնակչության հումանիտար ճգնաժամը, որտեղ որոշ տարածքներում սով է հայտարարվել:

Նեթանյահուն ասել է, որ Իսրայելը այլ ելք չունի, քան ավարտին հասցնել գործը և հաղթել ՀԱՄԱՍ-ին, քանի որ ծայրահեղական խմբավորումը հրաժարվել է զենքը վայր դնելուց: ՀԱՄԱՍ-ը հայտարարել է, որ չի զինաթափվի, քանի դեռ անկախ Պաղեստինի պետություն չի հաստատվել:

Հիշեցնենք, որ հերթական սրացումը սկսվել է 2023-ին։ ՀԱՄԱՍ-ի՝ 2023 թվականի հարձակումից հետո, որի ժամանակ, ըստ իսրայելական հաշվարկների, սպանվել է մոտ 1200 մարդ և 251-ը պատանդ վերցվել, Իսրայելը հակահարձակման է անցել ու այսօր արդեն վերահսկողություն ունի Գազայի 75%-ի նկատմամբ: Իսրայելի իշխանությունները հայտնում են, որ Գազայում մնացած 48 պատանդներից 20-ը ողջ են: Գազայի առողջապահության նախարարության տվյալներով, սպանել է ավելի քան 64,000 պաղեստինցի, ներքին տեղահանվել է գրեթե ամբողջ բնակչությունը, տարածքի մեծ մասը վերածվել է ավերակների: