Իսրայելը պատրաստ է ազատել պատանդներին, ՀԱՄԱՍ-ը՝ ոչ

Իսրայելի վարչապետ Բենիամին Նեթանյահուն հայտարարել է, որ իր երկիրը սկսում է պատանդների ազատ արձակման գործընթացի նախապատրաստումը։ Այս քայլը հետևել է ՀԱՄԱՍ շարժման կողմից ԱՄՆ նախագահ Դոնալդ Թրամփի առաջարկած խաղաղության ծրագրի մի մասի հետ համաձայնելուն։ Սակայն, չնայած առաջընթացին, ՀԱՄԱՍ-ն առաջ է քաշում նոր պայմաններ, որոնք կարող են բարդացնել գործընթացը։

Ի պատասխան ՀԱՄԱՍ-ի արձագանքին՝ Իսրայելի վարչապետի գրասենյակը հայտարարություն է տարածել, որում ասվում է․ «Հաշվի առնելով ՀԱՄԱՍ-ի արձագանքը՝ Իսրայելը պատրաստում է Թրամփի ծրագրի առաջին փուլի անհապաղ իրականացումը՝ բոլոր պատանդների անհետաձգելի ազատ արձակման համար»։ Հայտարարության մեջ նաև ընդգծվում է, որ Իսրայելը կշարունակի սերտորեն համագործակցել ԱՄՆ նախագահի և նրա թիմի հետ՝ «պատերազմն ավարտին հասցնելու Իսրայելի և Թրամփի սկզբունքներին համապատասխան»։

Միևնույն ժամանակ, ՀԱՄԱՍ-ը, հաստատելով, որ սկզբունքորեն պատրաստ է ազատ արձակել բոլոր պատանդներին, պնդում է, որ կորցրել է կապը նրանցից մի քանիսի հետ։ Այդ պատճառով շարժումը 72 ժամվա ընթացքում բոլորի վերադարձը «ոչ իրատեսական» է համարում և պահանջում է նոր բանակցություններ սկսել՝ ժամկետներն ու պայմանները վերանայելու համար։

Հիշեցնենք, որ ԱՄՆ նախագահ Դոնալդ Թրամփի կողմից առաջարկված խաղաղության ծրագիրը նախատեսում է հետևյալ քայլերի հաջորդականությունը։ Եթե երկու կողմերն էլ համաձայնում են պլանին, պատերազմն անմիջապես դադարեցվում է, և իսրայելական զորքերը հետ են քաշվում նախապես համաձայնեցված գիծ։ Դրանից հետո ՀԱՄԱՍ-ը պարտավորվում է ազատ արձակել բոլոր պատանդներին՝ և՛ ողջերին, և՛ զոհվածներին։ Իր հերթին, Իսրայելը պետք է ազատ արձակի ցմահ ազատազրկման դատապարտված 250 պաղեստինցի բանտարկյալներին, ինչպես նաև 2023 թվականի հոկտեմբերի 7-ից հետո ձերբակալված Գազայի 1700 բնակիչներին։