142 երկիր աջակցում է Իսրայել-Պաղեստին երկու պետության սկզբունքին

ՄԱԿ-ում 142 երկիր ընդունել է Նյու Յորքի հռչակագիրը՝ ի պաշտպանություն երկու պետության համակեցության սկզբունքի իրացման։ Այս մասին X-ի իր միկրոբլոգում գրել է Ֆրանսիայի նախագահ Էմանուել Մակրոնը։

«Այսօր Ֆրանսիայի և Սաուդյան Արաբիայի ղեկավարությամբ 142 երկիր ընդունել է Նյու Յորքի հռչակագիրը երկու պետությունների համակեցության սկզբունքի իրացման վերաբերյալ։ Միասին մենք անշրջելի ճանապարհ ենք բացում դեպի խաղաղություն Մերձավոր Արևելքում։

Ֆրանսիան, Սաուդյան Արաբիան և նրանց բոլոր գործընկերները կժամանեն Նյու Յորք՝ երկու պետությունների ստեղծման խորհրդաժողովում խաղաղության այս ծրագիրը կյանքի կոչելու համար։

Հնարավոր է այլ ապագա․ երկու ժողովուրդ, երկու պետություն՝ Իսրայել և Պաղեստին, որոնք ապրում են կողք կողքի խաղաղության և անվտանգության մեջ։ Մեզանից է կախված, որ դա տեղի ունենա»,– նշել է Մակրոնը։

Ըստ քվեարկության արդյունքների՝ հռչակագրին կողմ է քվեարկել նաև Հայաստանը։ Ընդհանուր առմամբ կողմ են քվեարկել 142 պետություն, դեմ՝ 10, ձեռնպահ՝ 12։