Ճապոնիայի վարչապետը հերքել է իր հրաժարականի մասին լուրերը

Ճապոնիայի վարչապետ Շիգերու Իշիբան հերքել է ճապոնական լրատվամիջոցների հաղորդագրություններն այն մասին, որ ինքը պատրաստվում է հրաժարական տալ։

«Որոշ լրատվամիջոցներ հայտնել են այդ մասին, բայց ես երբեք նման հայտարարություններ չեմ արել։ Այդ հաղորդումները չեն համապատասխանում իրականությանը», - այս մասին նա ԶԼՄ-ներին հայտնել է իր կուսակցության երեք բարձրաստիճան անդամների հետ հանդիպումից հետո։

Հիշեցնենք, որ ավելի վաղ Mainichi թերթը հայտնել էր, որ Իշիբան իր շրջապատին պատմել է օգոստոսի վերջին հրաժարական տալու ծրագրերի մասին։ Kyodo գործակալությունը, հղում անելով ԼԴԿ բարձրաստիճան ֆունկցիոներներին, հրաժարականն անվանել է անխուսափելի։ Yomiuri թերթը հայտնել է, որ Իշիբան անգամ հուլիսին կարող է հրաժարական տալ։