Թեհրանը Գազայի վերաբերյալ ՄԱԿ-ի բանաձևի մեջ գաղութատիրության հետքեր է տեսնում

Իրանի Իսլամական Հանրապետության արտաքին գործերի նախարարությունը հանդես է եկել պաշտոնական հայտարարությամբ՝ խիստ քննադատության ենթարկելով Գազայի հարցով ՄԱԿ-ի Անվտանգության խորհրդի ընդունած թիվ 2803 բանաձևը։ Թեհրանը, ողջունելով պաղեստինցի ժողովրդի դեմ «ցեղասպանությանն ու հանցագործություններին» վերջ տալուն ուղղված ցանկացած միջազգային ջանք, միևնույն ժամանակ արտահայտել է իր «լուրջ մտահոգությունը» բանաձևի մի շարք դրույթների վերաբերյալ, որոնք, ըստ իրանական կողմի, ոտնահարում են Պաղեստինի ժողովրդի հիմնարար իրավունքները։

Իրանի ԱԳՆ-ի գնահատմամբ՝ բանաձևի դրույթների զգալի մասը հակասում է պաղեստինցի ժողովրդի օրինական իրավունքներին։ Իրանական կողմը պնդում է, որ փաստաթուղթը, ըստ էության, Գազայի հատվածի վրա պարտադրում է «մի տեսակ խնամակալության համակարգ»՝ դրանով իսկ պաղեստինյան ազգին զրկելով իր հիմնարար իրավունքներից, մասնավորապես՝ ինքնորոշման և սուրբ Ալ-Քուդսը (Երուսաղեմ) մայրաքաղաք ունեցող անկախ պետություն ստեղծելու իրավունքից։ Թեհրանը պնդում է, որ ցանկացած քննարկում պաղեստինցի ժողովրդի ճակատագրի, այդ թվում՝ պաղեստինյան տարածքների կառավարման վերաբերյալ, պետք է ընթանա բացառապես պաղեստինյան ազգային համաձայնության շրջանակներում, և արտաքին ուժերի կողմից որևէ լուծման պարտադրումն անընդունելի է։

Հայտարարության մեջ նշվում է, որ բանաձևի հեղինակները «դիտավորյալ անտեսել են» ՄԱԿ-ի կենտրոնական դերը և Պաղեստինի հարցով նախկինում ընդունված բանաձևերը։ Իրանը նախազգուշացնում է Գազայի հատվածի օկուպացիայի ցանկացած լեգիտիմացման վտանգավոր հետևանքների մասին՝ ընդգծելով, որ Գազայի բաժանումը և նրա անջատումը Պաղեստինի միասնական աշխարհագրությունից հակասում են պաղեստինցի ժողովրդի ձգտումներին։

Այս համատեքստում Իրանը վերահաստատում է իր դիրքորոշումը՝ ընդգծելով «օկուպացիայի, ապարտեիդի և գաղութատիրության դեմ դիմադրության օրինականությունը՝ միջազգային իրավունքին համապատասխան»։ Ըստ Թեհրանի՝ դիմադրությունը պաղեստինցի ժողովրդի օրինական պատասխանն է պաղեստինյան հողերի շարունակվող օկուպացիային և սիոնիստական ռեժիմի ագրեսիային։

Իրանը հստակ սահմանում է միջազգային ուժերի ներգրավման իր պայմանները։ Ըստ ԱԳՆ-ի՝ ցանկացած միջազգային ուժ պետք է գործի բացառապես ՄԱԿ-ի վերահսկողության ներքո, և նրանց պարտականությունները պետք է սահմանափակվեն միայն հրադադարի ռեժիմի պահպանման, ինչպես նաև միջազգային մարդասիրական օգնության մուտքի և բաշխման վերահսկմամբ։

Հայտարարության մեջ շեշտվում է, որ ներկա իրավիճակում, երբ պաղեստինյան բնակչությունը ենթարկվում է «ցեղասպանության, պարտադրված սովի և գաղութային ոչնչացման», մարդասիրական օգնության տրամադրումը և անցակետերի լիարժեք բացումը պետք է դառնան գլխավոր առաջնահերթություններ։

Իրանը կոչ է անում միջազգային հանրությանը, հատկապես հրադադարի համաձայնագրի երաշխավորներին, ստիպել «ապարտեիդի և օկուպացիոն սիոնիստական ռեժիմին» դադարեցնել Պաղեստինի օկուպացիան և ամբողջությամբ դուրս բերել զորքերը Գազայի հատվածից։ Թեհրանը նաև հիշեցնում է ՄԱԿ-ի Անվտանգության խորհրդի «բացահայտ անփութության և անգործության» մասին՝ պաղեստինցիների ցեղասպանությունը դադարեցնելու հարցում և ընդգծում է Խորհրդի և նրա անդամ պետությունների պատասխանատվությունը՝ «ռազմական հանցագործներին և ցեղասպանություն իրականացրած անձանց» դատական հետապնդման ենթարկելու և պատասխանատվության կանչելու հարցում։