Վաշինգտոնյան փաստաթղթերում չի հիշատակվում «միջանցք»․ ՀՀ-ում Իրանի դեսպան

Հայաստանում Իրանի դեսպան Մեհդի Սոբհանին Isca News-ին հայտարարել է, որ Վաշինգտոնում ստորագրված փաստաթղթերում չի հիշատակվում տրանսպորտային ուղիներ կամ «միջանցք» անվանումով որևէ բան, այլ միայն քննարկվում է ուղիների բացումը, որոնք Ադրբեջանին կապահովեն Նախիջևան մուտք գործելու հնարավորություն, մինչդեռ Հայաստանը, իր հերթին, երկաթուղով կկապվի Իրանի Ջուլֆայի հետ։

Դեսպանի խոսքով՝ Հայաստանը և Միացյալ Նահանգները բանավոր համաձայնության են եկել, գրանցել հայ-ամերիկյան համատեղ ձեռնարկություն Հայաստանում, որոշել օպերատորին և ներդրողին նախագծի իրականացման համար, որն ամբողջությամբ կլինի Հայաստանի ինքնիշխանության և իրավասության շրջանակում և կկարգավորվի Հայաստանի անվտանգության, անձնագրային հսկողության ու մաքսային մարմիններով։

«Ըստ համաձայնագրի՝ դա յուրատեսակ օպերատորություն կլինի, այլ ոչ թե երթուղու տիրապետում»,- ընդգծել է Իրանի դեսպանը։ Նրա խոսքով՝ Ադրբեջանի և Հայաստանի միջև հայտարարության տեքստը, որի մանրամասները երկու երկրները պետք է քննարկեն ապագայում, լիովին հաշվի է առնում Իրանի համար ցանկալի հինգ սկզբունքները, «ներառյալ ազգային ինքնիշխանության և սահմանների ամբողջականության հանդեպ հարգանքը, իրավազորությունը, փոխադարձությունը և սահմանների անձեռնմխելիությունը, ուստի դրա վերաբերյալ անհանգստանալու որևէ պատճառ չկա»,- ասել է Մեհդի Սոբհանին։