Իրանի ջրային համակարգը կոլապսի մեջ է՝ շոգի պատճառով

Թեհրանի համալսարանի պրոֆեսոր, ջրային ռեսուրսների կառավարման մասնագետ Բենովշե Զահրայը, իրանցի սոցիոլոգ Մոհամմադ Ֆազելիի YouTube-ալիքին տված հարցազրույցում, որը լայնորեն տարածվել է սոցիալական ցանցերում, հայտարարել է երկրում ջրամատակարարման ծանր վիճակի մասին:

Պրոֆեսորի խոսքով՝ ընթացիկ տարին արդեն հինգերորդն է անընդմեջ, երբ տեղումների քանակը մնում է երկարաժամկետ միջին նորմայից ցածր: Նա ընդգծել է, որ անհրաժեշտ միջոցներ ձեռնարկելու համար մնացել է ընդամենը երկու-երեք շաբաթ: Հակառակ դեպքում, սեպտեմբերին Իրանը կարող է բախվել ջրամատակարարման համակարգի լիակատար փլուզման վտանգին:

Զահրայը նշել է, որ իրավիճակը լուրջ սպառնալիք է ներկայացնում Թեհրանի համար՝ որոշ ջրամբարներում ջրի պաշարներն արդեն սպառվել են: Բացի այդ, Համադան քաղաքում խնդիրը հասել է կրիտիկական մակարդակի. Էքբաթան ջրամբարում ջուրը լիովին վերջացել է:

Հուլիսի 18-ին Իրանում սկսված անոմալ շոգը հանգեցրել է ջրի և էլեկտրաէներգիայի մատակարարման խափանումների երկրի մի շարք շրջաններում: Շոգը ազդել է առնվազն 31 նահանգներից 18-ի վրա, որոնցից 10-ում ջերմաստիճանը գերազանցել է 40°C-ը: Առանձին շրջաններում գրանցվել են ռեկորդային 53°C:

Թեհրանում և այլ քաղաքներում փակվում են պետական հաստատությունները՝ ռեսուրսները խնայելու համար: Ըստ նահանգային ջրամատակարարման ընկերության տվյալների՝ մայրաքաղաքը բախվել է երաշտի. տեղումների մակարդակը հասել է 60-ամյա նվազագույնի, իսկ ամբարտակներում ջրի մակարդակը նվազել է մինչև վերջին դարի ռեկորդային ցածր մակարդակ: