Իրանը և Ռուսաստանը կստեղծեն համատեղ ծովային կոնսորցիում

Իրանը և Ռուսաստանը համաձայնության են եկել ստեղծելու համատեղ ծովային կոնսորցիում՝ նպատակ ունենալով զարգացնել երկկողմ առևտրատնտեսական հարաբերությունները։ Այս նախաձեռնության մասին հայտարարել է Մոսկվայում Իրանի դեսպան Քազեմ Ջալալին, հաղորդում է «Ռիա Նովոստի»-ն։

Դեսպանը X սոցիալական ցանցի իր էջում կատարած գրառմամբ հաստատել է լուրը. «Իրանը և Ռուսաստանը համաձայնության են եկել ստեղծել առաջին համատեղ ծովային նավագնացության կոնսորցիումը»։

Նրա խոսքով՝ այս ռազմավարական պայմանավորվածությունը ձեռք է բերվել նոյեմբերի 6-7-ը Մախաչկալայում կայացած բանակցությունների արդյունքում։ Հանդիպմանը մասնակցել են երկու երկրների իշխանությունների և խոշոր բիզնես ընկերությունների ներկայացուցիչներ։

Առաջիկայում կողմերը նախատեսում են մանրամասնորեն մշակել համաձայնագրի դրույթները՝ գործնական քայլեր ձեռնարկելու համար։