Ինդոնեզիայում սողանքի հետևանքով 6 մարդ է զոհվել

Ինդոնեզիայի Կենտրոնական Ջավա կղզում տեղատարափ անձրևների հետևանքով առաջացած խոշոր սողանքի հետևանքով զոհվել է վեց մարդ, ևս 17-ը համարվում են անհետ կորած։ Այս մասին հայտնում է ինդոնեզական Antara պետական լրատվական գործակալությունը։

Աղետը տեղի է ունեցել նոյեմբերի 13-ին, Չիլակապ քաղաքի Սիբեունիինգ գյուղում՝ ավերելով տասնյակ բնակելի տներ։ Աղետների հետևանքների վերացման ծառայության ներկայացուցիչը, որի խոսքը մեջբերում է «Antara»-ն, հայտնել է, որ որոնողափրկարարական աշխատանքները շարունակվում են։

«Մենք գտել ենք ևս երեք դիակ, մնացել է գտնենք 17-ին», - ասել է նա։

Փրկարարների համար աշխատանքները բարդանում են տեղանքի դժվարանցանելիության պատճառով, քանի որ զոհերը հայտնվել են 3-ից 8 մետր հողի շերտի տակ։

Հարավարևելյան Ասիայի այս երկրում անձրևային սեզոնը, որը սկսվել է սեպտեմբերին և կտևի մինչև ապրիլ, զգալիորեն մեծացնում է ջրհեղեղների և սողանքների վտանգը։ Սա այս տարվա ընթացքում Կենտրոնական Ջավայում տեղի ունեցած առաջին խոշոր աղետը չէ։ Հունվարին նահանգի մեկ այլ քաղաքում՝ Պեկալոնգանում, ուժեղ անձրևներից առաջացած սողանքը առնվազն 25 մարդու կյանք էր խլել։