Հնդկաստանը ՌԴ-ից նոր С-400-ներ է գնում

Չնայած արևմտյան պատժամիջոցներին և ԱՄՆ-ի նախազգուշացումներին, Հնդկաստանը շարունակում է ամրապնդել իր ռազմավարական գործընկերությունը Ռուսաստանի հետ՝ ռազմատեխնիկական ոլորտում։ Հնդկական Hindustan Times պարբերականի հաղորդմամբ՝ Նյու Դելին ուսումնասիրում է Ռուսաստանից С-400 «Տրիումֆ» զենիթահրթիռային համակարգերի լրացուցիչ հինգ միավոր գնելու հնարավորությունը։

Այս շաբաթ նախատեսվում է հանդիպում Հնդկաստանի և Ռուսաստանի պաշտպանության նախարարությունների ներկայացուցիչների միջև, որի ընթացքում կքննարկվեն գործարքի հնարավոր տարբերակները՝ ուղղակի գնում կամ համատեղ արտադրության կազմակերպում։ Այս բանակցությունները նախորդում են ՌԴ նախագահ Վլադիմիր Պուտինի՝ դեկտեմբերի 5-ին Հնդկաստան նախատեսված այցին, ինչը կարող է վկայել կողմերի՝ գործարքը մինչև բարձր մակարդակի հանդիպումը եզրափակիչ փուլ հասցնելու մտադրության մասին։

Հարկ է նշել, որ սա Հնդկաստանի և Ռուսաստանի միջև С-400 համակարգերի շուրջ առաջին գործարքը չէ։ 2018 թվականի հոկտեմբերին կողմերը կնքել էին 5.43 միլիարդ դոլար արժողությամբ պայմանագիր՝ հինգ միավոր С-400-ի մատակարարման վերաբերյալ։ Այդ համակարգերից երեքն արդեն մատակարարվել են, իսկ մնացած երկուսի առաքումը սպասվում է մինչև 2026 թվականի վերջ։

Նոր գործարքի անհրաժեշտությունը, ըստ հնդկական կողմի, պայմանավորված է երկրի օդային պաշտպանության կարողությունների հետագա ամրապնդմամբ։ Մասնավորապես, նախատեսվում է ուժեղացնել պաշտպանությունը Հնդկաստանի ավելի քան 7000 կմ երկարությամբ ափամերձ գծի երկայնքով և փակել օդային պաշտպանության բացերը երկրի հյուսիսային հրամանատարության գոտում։

Բանակցությունների ընթացքում քննարկվում է մի քանի սցենար։ Դրանցից մեկի համաձայն՝ հինգ համակարգերից երեքը կգնվեն ուղղակիորեն, իսկ մյուս երկուսը կարտադրվեն Հնդկաստանում՝ տեխնոլոգիաների փոխանցման միջոցով, որին կներգրավվեն տեղական մասնավոր ընկերություններ։