Հյուսիսային Կորեան ներկայացրել է նոր միջմայրցամաքային հրթիռ

Հյուսիսային Կորեան իշխող Աշխատավորական կուսակցության հիմնադրման 80-ամյակի առթիվ կազմակերպված զորահանդեսի ժամանակ ցուցադրել է իր նորագույն և, ինչպես պնդում են, «ամենահզոր» միջմայրցամաքային բալիստիկ հրթիռը։ Փհենյանի կենտրոնական հրապարակում տեղի ունեցած շքերթին հետևել է երկրի առաջնորդ Կիմ Չեն Ընը, որի կողքին նստած էին Չինաստանից, Ռուսաստանից և Վիետնամից ժամանած բարձրաստիճան պատվիրակություններ։

Հոկտեմբերի 10-ի ուշ երեկոյան մեկնարկած զորահանդեսի գլխավոր նորույթը «Հվասոնգ-20» միջմայրցամաքային բալիստիկ հրթիռն էր, որը պետական լրատվամիջոցները որակել են որպես «երկրի ամենահզոր միջուկային ռազմավարական զենքի համակարգ»։ Այս հրթիռը, որը տեղադրված էր 11-առանցքանի հսկայական մեքենայի վրա, ներկայացվել է որպես Հյուսիսային Կորեայի հեռահար միջուկային հնարավորությունների գագաթնակետ։

Փորձագետների կարծիքով, «Հվասոնգ» շարքի հրթիռները տեսականորեն Փհենյանին հնարավորություն են տալիս հարվածել ԱՄՆ-ի ցանկացած կետի, թեև հարցականի տակ են մնում դրանց նշանառության ճշգրտությունն ու մարտագլխիկի՝ մթնոլորտի խիտ շերտեր մտնելուց հետո դիմակայելու կարողությունը։ Ենթադրվում է, որ նոր համակարգը նախատեսված է մի քանի մարտագլխիկ կրելու համար, ինչը կարող է լրացուցիչ ճնշում գործադրել ԱՄՆ հակահրթիռային պաշտպանության համակարգերի վրա։

Զորահանդեսին ներկա էին Չինաստանի վարչապետ Լի Ցյանը, Ռուսաստանի նախկին նախագահ Դմիտրի Մեդվեդևի գլխավորած պատվիրակությունը և Վիետնամի կոմունիստական կուսակցության ղեկավար Տո Լամը։

Իր ելույթում Կիմ Չեն Ընը կոչ է արել զինված ուժերին շարունակել զարգանալ՝ դառնալով «անպարտելի» կառույց, սակայն ուղղակիորեն չի հիշատակել Վաշինգտոնին կամ Սեուլին։ Նա նաև «ջերմ խրախուսանք» է հղել արտասահմանյան գործողություններում ներգրավված հյուսիսկորեացի զինվորականներին՝ նշելով, որ նրանց հերոսությունը կդրսևորվի ոչ միայն հայրենիքի պաշտպանության, այլև «սոցիալիստական շինարարության առաջադիր դիրքերում»։