Հունգարիան կողմ է ռուսական գազի դեմ պատժամիջոցներին

Հունգարիայի կառավարությունը համաձայնություն է տվել Եվրամիությանն աջակցելու ռուսական հեղուկ բնական գազի (LNG) մատակարարումների արգելքի հարցում։ EUObserver-ի հաղորդմամբ՝ այս քայլը վերացնում է Ռուսաստանի դեմ պատժամիջոցների 19-րդ փաթեթի ընդունման գլխավոր խոչընդոտներից մեկը, սակայն ճանապարհին դեռևս մնում են այլ խոչընդոտներ՝ ի դեմս Ավստրիայի և Սլովակիայի։

Ըստ հրատարակության աղբյուրների՝ Բուդապեշտը, որը նախկինում հաճախ էր արգելափակում Ռուսաստանի դեմ ուղղված էներգետիկ պատժամիջոցները, այս անգամ հրաժարվել է ռուսական LNG-ի ներմուծման ամբողջական արգելքի առաջարկից բացառություններ պահանջելուց։ Եթե փաթեթը հաստատվի, ապա արգելքը կարող է ուժի մեջ մտնել 2027 թվականի հունվարից։

Սակայն Հունգարիայի դիրքորոշման փոփոխությունից հետո պատժամիջոցների նոր փաթեթի ընդունման գլխավոր խոչընդոտն այժմ դարձել են Սլովակիայի և Ավստրիայի դիրքորոշումները։ Աղբյուրները նշում են, որ Բրատիսլավան կարող է զիջումների գնալ առաջիկա հանդիպումների ընթացքում՝ լինի դա ԵՄ ԱԳ նախարարների հանդիպումը հոկտեմբերի 20-ին, թե ԵՄ գագաթնաժողովը հոկտեմբերի 23-ին։

Իրավիճակն ավելի բարդ է Ավստրիայի դեպքում։ Վիեննան պնդում է, որ իրեն տրվի «հատուկ բացառություն»՝ 2 միլիարդ եվրոյի ռուսական ակտիվներն ապասառեցնելու համար՝ դրանք Raiffeisen Bank-ին փոխանցելու նպատակով։ Այս պահանջը վտանգի տակ է դնում պատժամիջոցների ողջ 19-րդ փաթեթի ընդունումը, քանի որ Ավստրիան կարող է վետո կիրառել։ Բեռլինը և ևս տասը մայրաքաղաքներ արդեն իսկ քննադատել են Վիեննայի խնդրանքը՝ այն համարելով անընդունելի։

Ավելի վաղ հաղորդվում էր, որ Եվրահանձնաժողովը հետաձգել էր Ռուսաստանի դեմ պատժամիջոցների հերթական փաթեթի ներկայացումը, որը սպասվում էր սեպտեմբերի 17-ին։ Պատճառը ռազմավարության փոփոխությունն էր. Բրյուսելը որոշել էր նոր պատժամիջոցներ սահմանելու փոխարեն կենտրոնանալ Սլովակիայի և Հունգարիայի վրա ճնշում գործադրելու վրա, որպեսզի նրանք «նվազեցնեն կախվածությունը ռուսական նավթից»։ Այժմ, երբ Հունգարիան զիջումների է գնացել LNG-ի հարցում, ուշադրության կենտրոնում են հայտնվել Ավստրիան և Սլովակիան։