Հայաստանը Հնդկաստանից կգնի Su-30MKI բազմաֆունկցիոնալ կործանիչներ

Ռազմավարական նշանակության խոշոր գործարքի շրջանակում Հայաստանը, ըստ հնդկական լրատվամիջոցների, ավարտին է հասցնում Հնդկաստանի հետ բանակցությունները՝ HAL (Hindustan Aeronautics Limited) ընկերության արտադրության Су-30MKI բազմաֆունկցիոնալ կործանիչներ ձեռք բերելու շուրջ։ Այս քայլը դիտարկվում է որպես ուղղակի ռազմավարական հակակշիռ Ադրբեջանի կողմից վերջերս չին-պակիստանյան արտադրության 40 միավոր JF-17C Block-III կործանիչների ձեռքբերմանը։

Այս պայմանագիրը խորացնում է հայ-հնդկական պաշտպանական համագործակցությունը, որը վերջին տարիներին զգալի թափ է հավաքել։ Սա հաջորդում է մի շարք այլ գործարքների, այդ թվում՝ «Պինակա» համազարկային կրակի ռեակտիվ համակարգերի, «Սվատի» հակամարտկոցային ռադարների և հակատանկային առաջադեմ զինամթերքի ձեռքբերմանը։ Су-30MKI-ների համալրումը զգալիորեն կբարձրացնի Հայաստանի զսպման ներուժը և հեռահար օդային մարտական կարողությունները՝ տեխնոլոգիապես արդիականացված JF-17 օդուժի դեմ։

Գործարքը, որը գնահատվում է 2.5-ից 3 միլիարդ դոլար, առաջին փուլում, ամենայն հավանականությամբ, կներառի 8-ից 12 Су-30MKI ինքնաթիռների մատակարարում՝ համապատասխան ուսուցման, վերգետնյա սպասարկման և զինատեսակների ինտեգրման փաթեթով։ Ակնկալվում է, որ մատակարարումները կսկսվեն 2027 թվականի վերջին և կավարտվեն մինչև 2029 թվականը։

Հայաստանին մատակարարվելիք Су-30MKI-ի տարբերակը, ամենայն հավանականությամբ, կներառի հնդկական բացառիկ արդիականացումներ, ինչպիսիք են Uttam AESA ակտիվ ֆազավորված անտենային ցանցով ռադարը, Astra MK-1 և MK-2 տեսանելիության սահմաններից դուրս գործող հրթիռները և DRDO-ի ռադիոէլեկտրոնային պայքարի համալիրը։ Այս բարելավումները կործանիչին կապահովեն իրավիճակային իրազեկվածության և մարտունակության գերազանցություն՝ համեմատած JF-17C-ի չինական KLJ-7A ռադարի և PL-15 հրթիռային համակարգերի հետ։

Հնդկաստանի համար այս համաձայնագիրը կդառնա պաշտպանական արտահանման պատմության մեջ ամենախոշոր ձեռքբերումներից մեկը՝ ամրապնդելով HAL-ի հեղինակությունը որպես առաջադեմ բազմաֆունկցիոնալ կործանիչների արտադրող։ Այն նաև ուժեղացնում է Հնդկաստանի ռազմավարական ազդեցությունը Կովկասյան տարածաշրջանում՝ Նյու Դելիին դիրքավորելով որպես անվտանգության հուսալի գործընկեր՝ Թուրքիայի, Պակիստանի և Ռուսաստանի մասնակցությամբ փոփոխվող աշխարհաքաղաքական դինամիկայի պայմաններում։ Հայաստանի համար սա ռազմավարական շրջադարձ է դեպի Նյու Դելի՝ որպես առանցքային պաշտպանական գործընկեր։