Հայաստանում կներդրվի առողջության ապահովագրություն․ Անահիտ Ավանեսյան

ՀՀ առողջապահության նախարար Անահիտ Ավանեսյանը հայտարարել է Հայաստանում առողջության համապարփակ ապահովագրության ներդրման առաջին փուլի մեկնարկի մասին։ Իր ֆեյսբուքյան էջում նախարարը տեղեկացրել է, որ ծրագիրը կմեկնարկի 2026 թվականից՝ առաջնահերթություն տալով տարեց քաղաքացիներին։

«Առողջության ապահովագրության ներդրմամբ 2026թ.-ի ընթացքում առաջին փուլով համակարգ ներառվելու են 65+ տարիքի անձինք և նրանց ապահովագրավճարը փակելու է պետությունը»,— գրել է Ավանեսյանը։

Ծրագրից օգտվելու համար սահմանվել է երկու հիմնական պայման՝ ՀՀ քաղաքացիություն և ՀՀ-ում 183 օրից ավելի բնակություն (ռեզիդենտություն)։

Նախարարը հատուկ ընդգծել է, որ ծրագիրը կլինի համընդհանուր՝ անկախ քաղաքացու սոցիալական, առողջական կամ աշխատանքային կարգավիճակից։ 65-ից բարձր տարիքի անձինք կստանան ապահովագրություն՝ անկախ նրանից՝ ունեն հաշմանդամության կարգ, աշխատում են, ունեն քրոնիկ հիվանդություններ, թե ընդգրկված են սոցիալապես խոցելի որևէ խմբում։