Հավայան կղզիներում ժայթքել է Կիլաուեա հրաբուխը

Կիրակի օրը, շուրջ հինգ ժամ տևելուց հետո, ավարտվել է Հավայան կղզիներում գտնվող Կիլաուեա հրաբխի ժայթքման 36-րդ փուլը։ ԱՄՆ Երկրաբանական ծառայության (USGS) տվյալներով՝ ժայթքման ընթացքում լավայի շատրվանները հասել են մինչև 300 մետր (1000 ֆուտ) բարձրության՝ լավայով ծածկելով խառնարանի կեսից ավելին։

Իշխանությունները նախազգուշացրել են, որ հրաբխային գազերն ու մոխիրը քամու պատճառով կարող են տարածվել դեպի հարավ-արևմուտք՝ ազդելով հատկապես Կաու շրջանի վրա։

Քաղաքացիական պաշտպանության գործակալությունը շնչառական զգայունություն ունեցող բնակիչներին խորհուրդ է տալիս լրացուցիչ նախազգուշական միջոցներ ձեռնարկել, իսկ վարորդներին՝ զգույշ լինել ճանապարհներին՝ տեսանելիության հնարավոր վատթարացման պատճառով։