Հաջիևի հարցազրույցը խեղաթյուրվել է ադրբեջանական ԶԼՄ-ներում

Բաքվի պաշտոնական աղբյուրներն ահազանգում են՝ տեղեկատվության մանիպուլյացիայի և խեղաթյուրման դեպք է արձանագրվել։ Խնդիրը վերաբերում է Ադրբեջանի նախագահի օգնական Հիքմեթ Հաջիևի՝ EU Today պարբերականին տրված հարցազրույցին, որի բովանդակությունը տեղական աղբյուրները ներկայացրել են էական կրճատումներով՝ փոխելով ասվածի իմաստը։

Իրական հարցազրույցում Հաջիևը քննարկել է ռուս-ադրբեջանական հարաբերությունները՝ կապված վերջերս Ռուսաստանի կողմից ադրբեջանական քաղաքացիական ինքնաթիռի խոցման միջադեպի հետ։ Նա ընդունել է, որ միջադեպից անմիջապես հետո եղել են «որոշակի թյուրիմացություն» և «էմոցիաներ», սակայն նշել է, որ Բաքվի մտահոգությունները քննարկվել են Դուշանբեում։ Պաշտոնյան ձևակերպել է այն չորս տարրերը, որոնք Ադրբեջանը ձգտում է ստանալ Մոսկվայից՝ պաշտոնական ներողություն, լիարժեք հետաքննություն, արդարադատություն մեղավորների նկատմամբ և փոխհատուցում։

Հաջիևը շեշտել է կոնկրետ նախապայման. «Հենց որ այս հարցերը լուծվեն, մենք կթերթենք թյուրիմացության էջը և կշարունակենք նորմալ բարիդրացիական հարաբերությունները երկու երկրների միջև»:

Սակայն ադրբեջանական ռեսուրսները, վերատպելով նյութը, տեքստից հեռացրել են «Հենց որ հարցերը լուծվեն» արտահայտությունը։ Արդյունքում իմաստն ամբողջությամբ փոխվել է։ Ստեղծվում է տպավորություն, թե կողմերն արդեն իսկ «թերթել են թյուրիմացության էջը» և հարթել խնդիրները։ Մինչդեռ, օրիգինալ տեքստի համաձայն, Հաջիևը փաստում է, որ այդ հարցերը դեռևս լուծված չեն։