88 տարեկանում մահացել է ՀՀ ժողովրդական արտիստ Գուժ Մանուկյանը։ Դերասանը տևական ժամանակ հիվանդության պատճառով բեմ չէր բարձրանում։

1958թ․ ավարտել է Երևանի գեղարվեստա-թատերական ինստիտուտի դերասանական ֆակուլտետը։ Դերասանական ճանապարհը սկսել է թատրոնում, որի անդավաճան զինվորն էր տարիներ շարունակ։ Լավագույն անձնավորումներից են՝ Սարոն («Անուշ», ըստ Հովհաննես Թումանյանի), Պյոտրը (Մաքսիմ Գորկու «Քաղքենիներ»), Տիգրան Մեծը (Պերճ Զեյթունցյանի «Աստվածների կանչը) և այլն։

Կինոյում նկարահանվել է 1964 թ.-ից։ Դերերից են՝ Մարսելինը («Սգավոր ձյունը»), Արմենը («Կյանքի լավագույն կեսը»), Գայը («Մեռիր ձիու վրա»)։

Նրա մարմնավորած կերպարներին բնորոշ են հոգեբանական խնդիրների պարզ, համոզիչ լուծումները։

Գուժ Մանուկյանը շարունակել է բեմում և էկրաններին մնալ ՀՀ անկախությունից հետո ևս։ Իսկ վերջին տարիներին նկարահանվել է նաև հեռուստասերիալում։
Արժանացել է բազմաթիվ մրցանակների և պարգևների։ 1980թ․ ստացել է ՀԽՍՀ ժողովրդական արտիստի կոչումը, 1981թ․՝ ՀԽՍՀ Պետական մրցանակ, 1998թ․՝ Մովսես Խորենացու մեդալ։