Գիտնականը պնդում է՝ Երկրի վրա «այլմոլորակային» ԴՆԹ կա

ԴՆԹ ռեզոնանսի հետազոտական հիմնադրամի հիմնադիր և գործադիր տնօրեն, դոկտոր Մաքս Ռեմպելի նոր հետազոտությունը առաջ է քաշում սենսացիոն վարկած. մարդկային ԴՆԹ-ում կարող են առկա լինել գեների հատվածներ, որոնք կապված չեն ծնողների հետ և, հնարավոր է, «ներդրվել են» այլմոլորակայինների կողմից։ Այս վիճահարույց աշխատանքը, որը հրապարակել է Daily Mail-ը, կարող է հեղափոխություն առաջացնել մարդկության ծագման և էվոլյուցիայի մասին մեր պատկերացումներում, եթե, իհարկե, ստանա գիտական հաստատում։

«1000 գենոմ» նախագծի շրջանակներում 581 ընտանեկան գենոմի վերլուծության ընթացքում Ռեմպելը 11 ընտանիքում հայտնաբերել է ԴՆԹ-ի «մեծ հաջորդականություններ», որոնք չեն համընկել ծնողներից որևէ մեկի գենետիկական նյութի հետ։ Դրանց թվում առանձնանում է 348 գենետիկական տարբերակներից բաղկացած մի կլաստեր, որի մի մասը հանդիպում է մինչև 1990 թվականը ծնված երեխաների մոտ։ Այս հանգամանքը, ըստ Ռեմպելի, բացառում է գեների խմբագրման ժամանակակից տեխնոլոգիաների կիրառման հնարավորությունը։

Հետազոտությունը ներառել է նաև տվյալների վերլուծություն այն մարդկանցից, ովքեր պնդում են, թե «առևանգվել են այլմոլորակայինների կողմից»։ Որոշ ընտանիքներում նկատվել են մարկերների շղթաներ, որոնք կապված չեն ծնողների հետ, ինչը, ըստ Ռեմպելի, կարող է վկայել «այլմոլորակային ներդրումների» մասին։

Գիտնականը ընդունում է, որ եթե նման ներդրումները հաստատվեն, դա թույլ կտա նույնականացնել «օտար» ԴՆԹ ունեցող մարդկանց և բացահայտել պոտենցիալ նոր ունակություններ, ինչպիսին է, օրինակ, գենետիկական փոփոխության արդյունքում առաջացած հեռազգացությունը (տելեպատիա)։ Միևնույն ժամանակ, նա ընդգծում է, որ հետազոտությունը բարձրացնում է լուրջ էթիկական հարցեր. եթե այլմոլորակային ԴՆԹ-ն նույնականացվի, ինչպե՞ս պետք է պաշտպանվեն նման մարդկանց իրավունքները։

Ռեմպելը շեշտում է, որ իր եզրակացությունները դեռևս նախնական են և պահանջում են ավելի մանրակրկիտ վերլուծություն՝ օգտագործելով լրիվ գենոմային սեքվենավորում կամ նոր սերնդի տեխնոլոգիաներ, որոնք ունակ են բարձր ճշգրտությամբ հայտնաբերել հազվագյուտ գենետիկական վարիացիաներ։

Ռեմպելի աշխատանքն արդեն իսկ բուռն քննարկումների առիթ է դարձել։ Թերահավատները, ներառյալ ՉԹՕ-ների հետազոտողները, մատնանշում են ընտրանքի փոքր չափը և այլմոլորակայինների կողմից առևանգումների մասին պնդումները ստուգելու դժվարությունները։ Նրանք նախազգուշացնում են, որ նկատված անոմալիաները կարող են ունենալ երկրային կենսաբանական բացատրություններ կամ լինել տեխնիկական սխալների արդյունք։

Չնայած քննադատությանը՝ Ռեմպելը պնդում է, որ թեման գիտական մեծ հետաքրքրություն է ներկայացնում և պատրաստակամություն է հայտնում համագործակցել ընտանիքների հետ՝ ավելի որակյալ գենետիկական վերլուծություն անցկացնելու համար։

Փորձագետները նշում են, որ արդյունքները դեռևս փորձագիտական գրախոսություն չեն անցել և հաստատման կարիք ունեն։ Սակայն, եթե տեսությունը հաստատվի, դա կարող է դառնալ սենսացիա՝ համեմատելի արտերկրյա կյանքի հայտնաբերման հետ։ «Եթե դա ապացուցվի, մարդկությունը կբախվի իր գենետիկայի և մարդկային էվոլյուցիայի վրա արտերկրային ուժերի հնարավոր ազդեցության ընկալման հեղափոխական փոփոխությունների հետ», - հայտարարել է գիտնականը։