Գերմանիայի 10 մլրդ եվրոյանոց ռազմածովային նախագիծը ձախողման եզրին է

Գերմանիան ձեռնամուխ է եղել իր ռազմածովային հզորության արդիականացման ամենահավակնոտ նախագծին՝ Երկրորդ համաշխարհային պատերազմից ի վեր։ Կառավարությունը հաստատել է F126 տիպի վեց ֆրեգատների կառուցման ծրագիրը, որը համարվում է երկրի ամենախոշոր նավաշինական նախագիծը 1945 թվականից հետո։ Սակայն այս ռազմավարական նշանակության ծրագիրը բախվում է լուրջ մարտահրավերների՝ տեխնիկական խնդիրների, ժամկետների ձգձգման և ծախսերի զգալի աճի հետ։

Ինչպես հայտնում է BILD պարբերականը՝ վկայակոչելով իր աղբյուրները, պատվերի ընդհանուր արժեքը գերազանցում է 10 միլիարդ եվրոն։ Չնայած հսկայական ֆինանսական ներդրումներին, նախագիծը զգալիորեն հետ է մնում նախատեսված գրաֆիկից։ Առաջին ֆրեգատը Գերմանիայի ռազմածովային ուժերի սպառազինությանը պետք է հանձնվեր 2028 թվականին, սակայն այժմ պարզ է դարձել, որ այդ ժամկետը չի պահպանվի։ Խնդիրների հիմքում ընկած են տեխնիկական, մասնավորապես՝ IT համակարգերի հետ կապված դժվարությունները, որոնք ի հայտ են եկել նախագծի սկզբնական փուլում։

Սկզբնապես պայմանագիրը կնքվել էր նիդերլանդական Damen Naval նավաշինարանի հետ, սակայն նախագիծը փակուղի էր մտել։ Կառավարությունում նույնիսկ մտավախություն կար, որ ծրագիրը կարող է ընդհանրապես չեղարկվել։ Սակայն այժմ, որոշում է կայացվել շինարարությունը փոխանցել գերմանական Lürssen (NVL) ընկերությանը, որը պատրաստակամություն է հայտնել ստանձնել գլխավոր կապալառուի դերը։

Նախագծի իրականացման ընթացքում փոխվել է նաև դրա ռազմավարական հայեցակարգը։ F126 ֆրեգատները ի սկզբանե նախագծվել էին որպես հեռահար նավարկության ունիվերսալ նավեր։ Սակայն Ռուսաստանի ագրեսիվ քաղաքականության պայմաններում, ինչպես նշում են ռազմական փորձագետները, գերակայությունները փոխվել են։ Այժմ Գերմանիային անհրաժեշտ են հզոր մարտական նավեր՝ հատկապես Բալթիկ ծովում գործողություններ իրականացնելու համար։ «Բալթիկ ծովում մեզ անհրաժեշտ են մարտունակ նավեր, որոնք ունակ կլինեն զսպել ռուսական ուժերը», - BILD-ին ասել է աղբյուրներից մեկը։