Գերմանիան կոչ է անում ԱՄՆ-ին ներգրավել Ուկրաինայի անվտանգության երաշխիքներում

Օգոստոսի 24-ին, Գերմանիայի կառավարության բաց դռների օրվա ընթացքում արտաքին գործերի նախարար Յոհան Վադեֆուլը հայտարարել է, որ խաղաղ համաձայնագրից հետո Ուկրաինային պետք են անվտանգության երաշխիքներ՝ առավելագույնս մոտ ՆԱՏՕ-ին անդամակցությանը: Այդ մասին հայտնում է Deutsche Welle-ն։

«Մենք չենք կարող Ուկրաինայից պահանջել լրջորեն մտածել տարածքային զիջումների մասին, եթե նա չստանա առնվազն իրական անվտանգության երաշխիքներ հնարավորինս շատ պետություններից, որոնք կապահովեն առնվազն մնացած տարածքի անվտանգությունը»: Գերմանական դիվանագիտության ղեկավարը ընդգծել է, որ Ուկրաինայի համար անվտանգության երաշխիքները պետք է տրամադրեն ոչ միայն եվրոպական երկրները:

Նա կոչ է արել ընդլայնել երաշխավոր պետությունների շրջանակը և այդ գործընթացին ներգրավել նաև Վաշինգտոնին:

Նրա խոսքով՝ մոտ 30 պետություն, այդ թվում՝ Ճապոնիան, արդեն հայտարարել են Ուկրաինային աջակցելու պատրաստակամության մասին: Միևնույն ժամանակ, Վադեֆուլը զգուշացրել է, որ «անվտանգության երաշխիքի խախտումը կլինի հարձակում Ուկրաինայի վրա»:

Ընդգծել է, որ Ռուսաստանի հետ խաղաղության պայմանագիրը չպետք է դառնա «բռնապետական խաղաղություն»՝ ի վնաս Ուկրաինայի: Գերմանիայի ԱԳ նախարարը կոչ է արել Պուտինին դադարեցնել ագրեսիվ պատերազմը և նստել բանակցությունների սեղանի շուրջ: «Հակառակ դեպքում նա ստիպված կլինի հաշվի նստել մեր վճռական դիմադրության հետ՝ Ուկրաինայի կողմից», - զգուշացրել է Վադեֆուլը: