Գերմանիան կօրինականացնի ԱԹՍ-ներ խոցելը

Անօդաչու թռչող սարքերի (ԱԹՍ) կողմից ստեղծվող սպառնալիքների աճին զուգահեռ, Գերմանիան պատրաստվում է մշակել հստակ իրավական և գործառնական մեխանիզմներ՝ դրանց հակազդելու համար։ Երկրի պաշտպանության նախարար Բորիս Պիստորիուսը հայտարարել է, որ Բեռլինը մտադիր է օրենսդրորեն ամրագրել Եվրոպայի երկնքում անօդաչու սարքեր խոցելու իրավունքը՝ ընդգծելով, որ դա պահանջում է համապարփակ և համակարգված մոտեցում։ Նախարարի խոսքով՝ նախքան որևէ գործողություն ձեռնարկելը, անհրաժեշտ է ստեղծել իրավիճակի գնահատման հստակ համակարգ։ «Մեզ անհրաժեշտ է իրավիճակի հստակ պատկերացում. կոնկրետ ի՞նչ անօդաչու սարքերի մասին է խոսքը։ Արդյո՞ք դրանք այնպիսի սպառնալիք են, որին պետք է անհապաղ արձագանքել, թե՞ դա անմիջական վտանգ չի ներկայացնում։ Այս ամենը պետք է համաձայնեցվի, և դրա համար անհրաժեշտ է ամբողջական «իրավիճակային պատկեր»», - նշել է Պիստորիուսը։

Հենց այս համատեքստում, ըստ նրա, կառավարությունը կդիտարկի և կիրականացնի փոփոխություններ «Օդային տարածքի անվտանգության մասին» օրենքում։ «Ես կարծում եմ, որ դա միանգամայն հնարավոր է», - հավելել է նա։ Պաշտպանության նախարարը նաև համոզմունք է հայտնել, որ անհրաժեշտ է Բունդեսվերին (Գերմանիայի զինված ուժերը) ավելի ակտիվորեն ներգրավել այս գործընթացում՝ վարչական օգնություն ցուցաբերելու շրջանակներում։

Միևնույն ժամանակ, Պիստորիուսը շտապել է հերքել այն տպավորությունը, թե Գերմանիայում առկա է իրավասությունների շփոթություն։ «Գերմանիայում իրավասությունների խառնաշփոթ չկա։ Բացարձակապես հստակ սահմանված է, թե ով ինչի համար է պատասխանատու յուրաքանչյուր ոլորտում», - ընդգծել է նա։

Նախարարի խոսքով՝ իրական խնդիրը ոչ թե պատասխանատուների անորոշությունն է, այլ տարբեր մակարդակների՝ դաշնային, նահանգային և ռազմական կառույցների միջև փոխգործակցության բարելավման անհրաժեշտությունը։ «Այն, ինչ մենք իսկապես պետք է բարելավենք, տարբեր մակարդակների միջև փոխգործակցությունն է։ Սկսած, կրկնում եմ, իրավիճակի միասնական պատկերից և վերջացրած այնպիսի համակարգերի կիրառմամբ, որոնք, իդեալականորեն, պետք է համատեղելի լինեն միմյանց հետ և օգտագործվեն համակարգված՝ դաշնության, նահանգների և Բունդեսվերի մակարդակով», - եզրափակել է Պիստորիուսը։