Գերմանիայում անօդաչուների թռիչքները լրտեսության կասկած են առաջացրել

Գերմանիայի հյուսիսում գտնվող Կիլ քաղաքում լուրջ անհանգստություն է առաջացել՝ կապված ռազմական և քաղաքացիական կարևորագույն օբյեկտների վրայով անհայտ անօդաչու թռչող սարքերի (ԱԹՍ) համակարգված թռիչքների հետ։ Իշխանությունները հետաքննում են օտարերկրյա լրտեսության վարկածը, քանի որ թիրախների թվում են Thyssenkrupp Marine Systems (TKMS) ռազմական նավաշինարանը, որտեղ կառուցվում են սուզանավեր, և Շլեզվիգ-Հոլշտայնի համալսարանական կլինիկան։

Անցած շաբաթների ընթացքում, հատկապես սեպտեմբերի 29-ի գիշերը, դրոններ են նկատվել Կիլի երկնքում։ Դրանք թռիչքներ են իրականացրել ոչ միայն Thyssenkrupp-ի սուզանավեր արտադրող գործարանի, այլև ռազմածովային բազայի, Կիլի ջրանցքի շլյուզների և տեղի էլեկտրակայանի վրայով։ Ականատեսները հայտնել են, որ որոշ դեպքերում դրոնները թռել են համակարգված շարքով, ինչը վկայում է դրանց պրոֆեսիոնալ կառավարման մասին։

Իրավիճակի լրջությունից ելնելով՝ հետաքննությունը վերցրել են Քրեական ոստիկանության դաշնային վարչությունը (LKA) և Պետական անվտանգության ծառայությունը։ Շլեզվիգ-Հոլշտայնի ներքին գործերի նախարար Սաբինե Զյուտերլին-Վաակը հաստատել է միջադեպերը՝ նշելով, որ իշխանությունները շատ լուրջ են վերաբերվում այս դեպքերին։ «Մենք չենք կարող բացառել, որ սա կարող է լինել լրտեսություն», - հայտարարել է նա։

Thyssenkrupp Marine Systems ընկերությունը Գերմանիայի և ՆԱՏՕ-ի դաշնակիցների համար ռազմական նավերի և սուզանավերի կարևորագույն մատակարարն է։ Այս օբյեկտի նկատմամբ ցուցաբերվող ուշադրությունը մեծացնում է կասկածները, որ թռիչքների հետևում կարող են կանգնած լինել օտարերկրյա ուժեր, որոնք փորձում են տեղեկություններ հավաքել գերմանական ռազմական տեխնոլոլոգիաների մասին։

Համալսարանական կլինիկայի վրայով թռիչքները նույնպես տագնապ են առաջացրել, քանի որ այն համարվում է կրիտիկական ենթակառուցվածքի օբյեկտ։

Ներկայումս իրավապահ մարմինները շարունակում են հետաքննությունը՝ փորձելով պարզել դրոնների ծագումը և դրանց օպերատորների ինքնությունը։ Այս միջադեպերը հերթական անգամ ընդգծում են կրիտիկական ենթակառուցվածքների անվտանգության ապահովման հրատապությունը՝ լրտեսության և դիվերսիաների նոր սպառնալիքների պայմաններում։