Գերմանիայի և Եվրամիության միջև լարվածություն է հասունանում

Գերմանիայի և Եվրամիության միջև լարվածություն է հասունանում առանցքային որոշումներ կայացնելու իրավունքի շուրջ։ Իշխանության համար այս պայքարը, որը ծավալվում է Բեռլինի և Բրյուսելի միջև, սպառնում է մակերես դուրս գալ մի այնպիսի պահի, երբ Եվրամիությունը փորձում է միասնականություն ցուցադրել բազմաթիվ արտաքին մարտահրավերների դիմաց։

Այս դիմակայության կենտրոնում են երկու հզոր քաղաքական գործիչներ՝ Գերմանիայի կանցլեր Ֆրիդրիխ Մերցը, որը գնալով ավելի վճռական դիրքորոշում է որդեգրում, և Եվրահանձնաժողովի նախագահ Ուրսուլա ֆոն դեր Lայենը, որը նախկինում եղել է Մերցի ներկուսակցական մրցակիցը գերմանացի պահպանողականների շարքերում։ Նրանց նախկին քաղաքական մրցակցությունն այժմ նոր դրսևորում է ստանում համաեվրոպական մակարդակում։

Ֆրիդրիխ Մերցը չի թաքցնում իր դժգոհությունը և բացահայտ քննադատում է Ուրսուլա ֆոն դեր Լայենի քաղաքականությունը մի շարք առանցքային ոլորտներում։ Դրանց թվում են առևտուրը, ԵՄ բյուջեն, «կանաչ» քաղաքականությունը և պաշտպանությունը։ Գերմանիայի կանցլերը պահանջում է վերջ տալ այն երևույթին, որը նա համարում է Բրյուսելի կողմից չափազանց մեծ միջամտություն՝ ի վնաս ազգային կառավարությունների իրավասությունների։

Ըստ էության, սա պայքար է այն հարցի շուրջ, թե ով պետք է սահմանի «խաղի կանոնները» Եվրամիությունում՝ ազգային մայրաքաղաքնե՞րը, թե՞ ԵՄ կենտրոնական կառույցները։ Մերցը ձգտում է վերականգնել ազգային կառավարությունների, և առաջին հերթին՝ Գերմանիայի, որպես ԵՄ խոշորագույն տնտեսության, որոշիչ դերը։ Նա դեմ է կենտրոնացված կառավարման մոդելին, որը, նրա կարծիքով, խթանում է ֆոն դեր Լայենի գլխավորած Եվրահանձնաժողովը։

Այս մրցակցությունը ոչ միայն անձնական կամ քաղաքական բնույթ է կրում, այլև հանդիսանում է լուրջ փորձություն Եվրամիության ողջ ղեկավարության համար։ Սա եվրոպական ընտանիքի համար վտանգավոր վիճակ է՝ հատկապես ներկա ակտիվ զարգացումները և տարբեր հատվածներից Եվրոպային սպառնացող անվտանգային սպառնալիքները հաշվի առնելով։