Գերմանիայի բյուջեում 171 մլրդ եվրոյի պակասուրդ կա

Գերմանիան 2026թ․ դաշնային բյուջեի նախագծում պակասուրդ ունի։ Ըստ BILD-ի տվյալների, մինչև 2029թ․ դեֆիցիտը կազմում է 171 միլիարդ եվրո՝ 27 միլիարդով ավելի, քան ենթադրվում էր ընդամենը հինգ շաբաթ առաջ։ Այն ժամանակ ֆինանսների նախարար Լարս Կլինգբայլը նշել էր 144 միլիարդ եվրո դեֆիցիտի մասին։ Աճը կապված է նոր ծախսերի հետ, ներառյալ երկրամասերին փոխհատուցումները և տոկոսադրույքների վերանայումը։

Ֆինանսների նախարարությունն ընդունում է, որ դեֆիցիտը շատ մեծ է։ Հիմնական խնդիրը այն հնարավորինս արագ կրճատելն է։ Միայն 2027թ․ կառավարությունը պետք է խնայի 34 միլիարդ եվրո, 2028-ին՝ 63 միլիարդ, իսկ 2029-ին՝ 74 միլիարդ։

Իշխանություններն արդեն հայտարարել են առաջին միջոցառումների մասին։ Մասնավորապես, նախատեսվում է կրճատել նախարարությունների անձնակազմի ծախսերը տարեկան 2%-ով, վարչական ծախսերը՝ 10%-ով, ինչպես նաև կրճատել սուբսիդիաներն ու զարգացման ծրագրերը։ Սակայն նախարարությունում ընդունում են, որ «այսպես նպատակին չեն հասնի»։

Կառավարությունը մեծ հույսեր է կապում սոցիալական ապահովության բարեփոխումների հանձնաժողովի հետ։ Ակնկալվում է, որ փորձագետները կառաջարկեն կոնկրետ փոփոխություններ առողջապահության, կենսաթոշակային համակարգի, խնամքի և այլ սոցիալական ծախսերի ոլորտներում։