Սիրիացի փախստականները պետք է վերադառնան հայրենիք․ Ֆրիդրիխ Մերց

Գերմանիայի քաղաքականության մեջ նոր շրջափուլ է սկսվել սիրիացի փախստականների հարցում։ Կանցլեր Ֆրիդրիխ Մերցը հայտարարել է, որ Բեռլինը պատրաստվում է վերանայել սիրիացիներին ապաստան տրամադրելու իր մոտեցումը՝ ընդհուպ մինչև արտաքսումների իրականացում։ Այս հայտարարությունը նշանավորում է կուրսի կտրուկ փոփոխություն, որը երկար տարիներ որդեգրել էր Բեռլինը՝ մարդասիրական ճգնաժամի պայմաններում։

«Սիրիայում քաղաքացիական պատերազմն ավարտված է։ Այժմ Գերմանիայում ապաստան տրամադրելու համար բացարձակապես ոչ մի հիմք չկա, և այդ պատճառով մենք կարող ենք սկսել արտաքսումները»,- կանցլեր Մերցի խոսքերն է մեջբերում «Deutsche Welle»-ն՝ որպես գերմանական կառավարության նոր դիրքորոշման բնութագրիչ։

Այս հայտարարությունը փաստացիորեն վերացնում է այն իրավական և մարդասիրական հիմքը, որի վրա կառուցվում էր սիրիացի փախստականներին պաշտպանություն տրամադրելու քաղաքականությունը։ Կանցլերի խոսքով՝ իրավիճակի փոփոխությունը Սիրիայում թույլ է տալիս և պարտադրում է վերանայել Գերմանիայի պարտավորությունները։

Ֆրիդրիխ Մերցը նաև հույս է հայտնել, որ փախստականների զգալի մասը սեփական նախաձեռնությամբ կվերադառնա հայրենիք՝ մասնակցելու իրենց երկրի վերականգնման գործընթացին։ Նա ընդգծել է, որ Սիրիան այսօր իր քաղաքացիների կարիքն ունի՝ ավերված ենթակառուցվածքները վերականգնելու և պետությունը վերակառուցելու համար։ Այս կոչը կարելի է դիտարկել որպես ուղերձ Գերմանիայում բնակվող սիրիական համայնքին՝ ստանձնելու պատասխանատվություն իրենց երկրի ապագայի համար։ Կառավարությունը, ըստ ամենայնի, կխրախուսի կամավոր վերադարձի ծրագրերը՝ փորձելով մեղմել լարվածությունը և գործընթացը դարձնել առավել կառավարելի։

Սակայն, կանցլերը նաև հստակ նախազգուշացում է հնչեցրել նրանց համար, ովքեր կհրաժարվեն կամավոր վերադառնալ։ «Նրանք, ովքեր կհրաժարվեն Գերմանիայից վերադառնալ հայրենիք, ապագայում կարող են արտաքսվել», - հավելել է նա։ Սա նշանակում է, որ Բեռլինը պատրաստ է կիրառել նաև վարչական լծակներ՝ իր քաղաքականությունը կյանքի կոչելու համար։ Արտաքսումը կդառնա ծայրահեղ, բայց իրատեսական միջոց այն անձանց համար, ովքեր այլևս չեն համապատասխանում ապաստան ստանալու չափանիշներին։